Á.Mámbetov atyndaǵy memlekettik drama jáne komedııa teatrynda Qazaqstannyń eńbek sińirgen qaıratkeri, 2019-2023 jyldary mádenıet vıe-mınıstri qyzmetin atqarǵan Nurǵısa Dáýeshovtiń «Tıek» atty shyǵarmashylyq keshi dúrkirep ótti.
Óner ıesiniń ózi áńgimesiniń álqıssasynda:
– Qazaqta «tilge tıek etý» degen tirkes bar. Ár istiń tıegin aǵytyp, tetigin tapsa nátıjeli bolady. Dombyranyń qos ishegin tıek kóterip turmasa, sol tıek dál ornynda turmasa, qońyr únniń shyqpasy da belgili. Aqyn Jumaeken Nájemedenov:
Syrlasam kókiregime súıep turyp,
Janymnyń jazyǵyna kúı ektirip,
Oı, arman – eki shegiń bolsa seniń,
Bereıin júregimdi TIEK qylyp, – dep dombyranyń tıegin aspaptyń júregi dep baǵalaǵan. Endeshe biz asa eskere bermeıtin tıektiń maǵynasy zor, – dep shyǵarmashylyq keshtiń ataýy men mán-maǵynasyn tarqata aıtty.
Kesh barysynda Nurǵısa Dáýeshov ár kúıdiń shyǵý tarıhyn sózge tıek etip, áserli kúı tartysty ónerdegi ózi kýá bolǵan sáttermen, hıkaıattarmen tuzdyqtap otyrdy. Ásirese, qazaq kúı óneriniń has sheberleri Qalı Jantileýov, Nurǵısa Tilendıev, Qarshyǵa Ahmedııarov, Qyrymgereı Qajymov, Tuıaqberdi Shámelovtiń ǵıbratty ómirinen syr shertip, olardyń shyǵarmalaryn erekshe yqylaspen oryndaýynan Nurǵısanyń ózi de qazaq kúı óneriniń kánigi nasıhatshysy ekenin ańǵardyq. Qaıda júrse de, qazaqtyń kúmbirli kúıin tórge shyǵarý úshin ter tógip júrgen Nurǵısa aǵalar amanatyna adaldyǵyn bildirip: «Mynaý qolymdaǵy qazaqtyń dáýlesker kúıshisi Qalı Jantileýovtyń dombyrasy. Bul dombyraǵa 75 jyl bolǵan» dedi.
Shyǵarmashylyq keshtiń taǵy bir ereksheligi – Súgir mektebin jalǵaǵan Tólegen Mombekovtyń súbeli kúıi «Saltanat» alǵash ret E.Rahmadıev atyndaǵy akademııalyq fılarmonııanyń Kameralyq hordyń jáne «Qorqyt» ansambliniń súıemeldeýimen oryndaldy. Hordyń azaly daýysy men kúı kúmbiri qosylǵanda, jınalǵan qaýym erekshe tebirendi.
Konertte kúı tarıhyn áserli jetkizýdiń taǵy sátti sheshimine kýá boldyq. Nurǵısa Dáýeshov Qarshyǵa Ahmedıarov aǵamyzdyń Qytaı eline búıregin emdetýge barǵanda, aýrýhanada shıpasyn zaryǵa kútip, Jaratýshydan medet tilep jatqan kórshiles qyrǵyz baýyry Rýslan esimdi azamatqa arnap shyǵarǵan «Kútkende» kúıin oryndady. Sol kezde anımaııa óneriniń sheberi Aıjan Jarkeshova qummen sýret salyp, oqıǵany kóz aldymyzǵa keltirdi.
Al kesh ıesiniń ónerdegi qanattas dosy – Qyrǵyzstannan arnaıy kelgen qomyzshy qyz Gúlshat Taalaıbekovamen kúı aıtysyna tań-tamasha bolǵan kórermen osyndaı rýhanı lázzat syılaǵan kesh úshin óner ıesine alǵysyn jaýdyrdy
