Almaty áýejaıynda qatty jel men nóser jańbyrǵa qaramastan, Dýshanbeden ushyp kelgen jolaýshylar ushaǵy apatty jaǵdaıda jerge sátti qondy, dep habarlaıdy “Adyrna” ulttyq portaly Orda.kz-ke siltep.
kris_p_almata Instagram paraqshasynda jarııalanǵan beınejazbada ushaqtyń qoný sáti túsirilgen. Jolaýshylar jelige júktegen kadrlarda úreıli sátterdi bastan ótkergenin baıqaýǵa bolady. Qatty jelmen shaıqalǵan ushaqqa qaramastan, ushqysh áýe kemesin basqaryp, jolaýshylardyń aman-esen jerge túsýin qamtamasyz etti.
Jeli qoldanýshylary ushqyshtyń kásibıligi men batyl áreketin joǵary baǵalap, rızashylyqtaryn bildirýde. «Naǵyz erlik», «Ushqyshqa alǵys», «Qudaı saqtaǵan» degen pikirler jıi jazylýda.
Aıta keteıik, buǵan deıin de osyndaı oqıǵalar oryn alǵan bolatyn. Ótken jyldyń sońynda Azerbaijan Airlines áýe kompanııasyna tıesili Embraer 190 ushaǵy Baký–Groznyı baǵytynda ushyp bara jatyp, Aqtaý mańynda apatqa ushyraǵan edi. Saldarynan birneshe adam qaza tapqan. Kóz jumǵandardyń qatarynda qazaqstandyqtar da boldy.
