Oblys qurylǵanǵa deıin Jetisý óńirinde nebary tek 5 eldi meken gazdandyrdyrylǵan bolsa, búginge deıin taǵy 79 eldi mekenge tabıǵı gaz jetkizildi. Sóıtip oblysta qazir 84 eldi mekenge gaz tartyldy, sonyń 21-i jyl basynan beri kógildir otynǵa qol jetkizdi, - dep habarlaıdy "Adyrna" ulttyq portaly Jetisý oblysy ákiminiń baspasóz qyzmetine silteme jasap.
Jalpy, gazdandyrý – Prezıdenttiń tapsyrmasyna sáıkes oblys basshylyǵy erekshe mán berip otyrǵan basym baǵyttardyń biri. 2025 jyldyń sońyna deıin óńirde gazdandyrý deńgeıi 71,4% bolyp, Panfılov aýdanyn qosa alǵanda, Kerbulaq aýdanynan Taldyqorǵanǵa deıingi 500 myńnan astam halqy bar 126 eldi meken gazǵa qol jetkize alady.
Turǵyndardyń aıtýynsha, kógildir otynnyń kelýimen birge aýyldaǵy turmys ta jaıly bola túsken:
- Bizdiń aýylǵa gaz 2023 jyldan bastap berile bastady. Kógildir otyn jetkiziledi degendi estigennen keıin otbasymyzǵa jańa úı turǵyzdyq. Endi pesh jaǵýdyń, kómir-otyn tasýdyń qajeti bolmaıdy. Qazir jańa úıimizde gaz da, sý da bar. Memleket tarapynan aýyldyq jerge barlyq jaǵdaı jasalyp jatqany qýantady, - dedi Kóksý aýdany Aldabergenov aýylynyń turǵyny Qudaıbergen Mahmetov.
Sonymen qatar 2024 jyldyń tamyz aıynda «Taldyqorǵan-Úsharal» magıstraldy gaz qubyrynyń qurylysy bastaldy. Bıylǵy jyldyń kúzinde aıaqtalady dep kútilýde. Bul jobany iske asyrýdyń nátıjesinde Alakól, Aqsý, Sarqan aýdandarynyń 66 eldi mekeni gazben qamtamasyz etilmek.
Sondaı-aq aldaǵy ýaqytta oblysty tabıǵı gazben qosymsha qamtamasyz etý úshin «Almaty - Taldyqorǵan» lýpıngisiniń (ekinshi tarmaǵy) qurylysyn salýǵa qatysty daıyndyq júrgizilýde.
Atap ótsek, gazdandyrý isi barysynda 1800-deı turaqty jáne ýaqytsha jumys oryndary ashyldy.
Gaz qostyrý qunyna toqtalsaq, oblys ákiminiń tapsyrmasyna sáıkes qabyldanǵan sharalardyń arqasynda básekelestik ortany damytý arqyly gaz qostyrý qunyn qazandyq pen qajetti jıyntyqtardy qospaǵanda 170-175 myń teńgege deıin tómendetýge múmkindik týdy (gaz qubyrynyń uzyndyǵy 25 metrge deıin). Sonymen birge bir jarym jyldyń ishinde 1600 gaz qazandyǵyn satyp alýǵa 500 mıllıon teńge bólindi, turǵyndarǵa qazandyqtyń tólemin 10 aıǵa deıin bólip tóleýge jeńildikti jaǵdaı jasalyp otyr.
Jalpy, 2028 jylǵa qaraı Jetisý oblysynda gazdandyrýǵa jatatyn 192 eldi mekenge tolyqtaı gaz tartylady. Sonyń arqasynda 624 myńnan astam turǵyn nemese óńir halqynyń 91%-y kógildir otynǵa qol jetkize alady.
Osylaısha jetisýlyqtardyń turmys sapasyn jaqsartýǵa baǵyttalǵan gazdandyrý jumysy ákimdik tarapynan aldaǵy ýaqytta da jalǵasady.
