Mıanmada bolǵan joıqyn jer silkinisi saldarynan Mandalaı qalasyndaǵy meshit qulap, keminde 10 adam kóz jumdy, dep habarlaıdy "Adyrna" ulttyq portaly.
Jergilikti Khit Thit basylymynyń málimetinshe, meshit úıindileriniń astynan birneshe adamnyń denesi tabylǵan. 7,9 baldyq alǵashqy zilzaladan keıin 12 mınýttan soń 6,4 baldyq taǵy bir jer silkinisi boldy.
Zilzala kórshi elderde de aıtarlyqtaı sezildi. Taılandtyń Bangkok qalasynda bılik kópqabatty úılerden turǵyndardy evakýaııalap, metro qozǵalysyn ýaqytsha toqtatty. Sonymen qatar, jer asty dúmpýleri Bangladesh, Úndistan, Laos, Qytaıda da baıqalǵan.
Qazirgi tańda Mıanmada qutqarý jumystary júrgizilýde. Bılik qıraǵan ǵımarattar astynda adamdar qalýy múmkin ekenin aıtyp, zardap shekkender sanyn naqtylaý ústinde.
Tabıǵı apatqa baılanysty eldiń birneshe aımaǵynda tótenshe jaǵdaı jarııalandy.
