Búgin Parlament Májilisiniń otyrysynda depýtat Rınat Zaıtov úsh jyl ishinde júzege asqan saıası reformalardyń aralyq qorytyndylaryna toqtaldy. Onyń aıtýynsha, elimizde úlken jetistikterge qaraı nyq qadam jasalyp keledi. Bul, eń aldymen, Memleket basshysy Qasym-Jomart Toqaevtyń saıası ınstıtýttarǵa jáne halyqtyń únin jetkizetin azamattarǵa artqan seniminiń nátıjesi.
«Qazaq úshin qashannan da beri eldiń amanaty men seniminen aýyr júk joq. «Dóp» bassań – el úmitin aqtaǵan ersiń, «qalt» bassań – jaýdan beter ezsiń! Keıde tipti kótergen suraǵyńa orynsyz syn taǵyp, «Osy másele sender qozǵaıtyn taqyryp pa? Nege joǵarydaǵylar usaq-túıek máseleler qozǵaıdy» dep jatady. Óz basym bul synmen kelispeımin. Sebebi biz – bir memleketpiz», – dedi Rınat Zaıtov.
Sonymen qatar ol sońǵy jyldary Májilis pen máslıhattar arasyndaǵy baılanys nyǵaıyp, óńirlik deńgeıde de belsendi jumys júrip jatqanyn aıtty. Bul úderiste «AMANAT» partııasynyń barlyq deńgeıdegi máslıhat depýtattarynyń forýmdary úlken ról atqarǵanyn atap ótti.
Rınat Zaıtov Májiliste apta saıyn depýtattardyń úkimet múshelerine saýal joldap, ótkir suraqtar qoıyp otyrǵanyn aıtty. Onyń pikirinshe, Májiliste qoǵam belsendileri men sarapshylardyń qatysýymen eldi tolǵandyratyn máseleler ashyq ári búkpesiz talqylanyp keledi. Bul úrdis halyqtyń bılikke degen senimin qaıta tiriltýge yqpal etip otyr. Depýtat eldegi ózekti máseleler qoǵam ókilderimen jáne sarapshylarmen birge ashyq talqylanyp jatqanyna da nazar aýdardy.
«Osylaısha, qoǵamdy tolǵandyratyn kóptegen másele sheshimin taýyp, eldiń irgesi bekı tústi. Árbir ıgi is júzege asqan saıyn halyqtyń bılikke degen senimi artyp keledi», – dedi Rınat Zaıtov.
Sonymen qatar depýtat qoǵamdaǵy rýhanı daǵdarys máselesine de toqtaldy. Ol rýhanı tozýdyń, qatygezdiktiń artqanyn atap ótip, buǵan turmystyq qıyndyqtar, tárbıeniń álsireýi jáne áleýmettik jelidegi teris aqparattar yqpal etip otyrǵanyn aıtty.
Bul rette tárbıe jumysyn kúsheıtýdi, jas urpaqtyń boıyna meıirim, ádilettilik pen memleketshildikti nasıhattaıtyn kontentti damytý qajettigine toqtaldy.
«Tárbıe tal besikten degendeı, Qazaqstandaǵy mýltfılmnen kınoǵa, balabaqshadaǵy taqpaqtan romandarǵa deıin adamdardyń boıyndaǵy meıirim men baýyrmaldyqty, memleketshildik pen ádildikti nasıhattaýy kerek. Sonda ǵana biz Qazaq memleketiniń baıraǵyn qulatpaı, mártebesin asqaqtatatyn urpaq ósire alamyz. Qazaq memleketiniń materıaldyq emes qundylyqtaryn qaıta túgendep, ony jastardyń sanasyna sińirý – bizdiń mindetimiz», — dep qorytyndylady ol.
