Eldegı özektı mäseleler aşyq talqylanyp jatyr – Rinat Zaitov

Bügın Parlament Mäjılısınıŋ otyrysynda deputat Rinat Zaitov üş jyl ışınde jüzege asqan saiasi reformalardyŋ aralyq qorytyndylaryna toqtaldy. Onyŋ aituynşa, elımızde ülken jetıstıkterge qarai nyq qadam jasalyp keledı. Būl, eŋ aldymen, Memleket basşysy Qasym-Jomart Toqaevtyŋ saiasi instituttarǧa jäne halyqtyŋ ünın jetkızetın azamattarǧa artqan senımınıŋ nätijesı. «Qazaq üşın qaşannan da berı eldıŋ amanaty men senımınen auyr jük joq. «Döp» bassaŋ – el ümıtın aqtaǧan ersıŋ, «qalt» bassaŋ – jaudan beter ezsıŋ! Keide tıptı kötergen sūraǧyŋa orynsyz syn taǧyp, «Osy mäsele sender qozǧaityn taqyryp pa? Nege joǧarydaǧylar ūsaq-tüiek mäseleler qozǧaidy» dep jatady. Öz basym būl synmen kelıspeimın. Sebebı bız – bır memleketpız», – dedı Rinat Zaitov. Sonymen qatar ol soŋǧy jyldary Mäjılıs pen mäslihattar arasyndaǧy bailanys nyǧaiyp, öŋırlık deŋgeide de belsendı jūmys jürıp jatqanyn aitty. Būl üderıste «AMANAT» partiiasynyŋ barlyq deŋgeidegı mäslihat deputattarynyŋ forumdary ülken röl atqarǧanyn atap öttı. Rinat Zaitov Mäjılıste apta saiyn deputattardyŋ ükımet müşelerıne saual joldap, ötkır sūraqtar qoiyp otyrǧanyn aitty. Onyŋ pıkırınşe, Mäjılıste qoǧam belsendılerı men sarapşylardyŋ qatysuymen eldı tolǧandyratyn mäseleler aşyq ärı bükpesız talqylanyp keledı. Būl ürdıs halyqtyŋ bilıkke degen senımın qaita tırıltuge yqpal etıp otyr. Deputat eldegı özektı mäseleler qoǧam ökılderımen jäne sarapşylarmen bırge aşyq talqylanyp jatqanyna da nazar audardy. «Osylaişa, qoǧamdy tolǧandyratyn köptegen mäsele şeşımın tauyp, eldıŋ ırgesı beki tüstı. Ärbır igı ıs jüzege asqan saiyn halyqtyŋ bilıkke degen senımı artyp keledı», – dedı Rinat Zaitov. Sonymen qatar deputat qoǧamdaǧy ruhani daǧdarys mäselesıne de toqtaldy. Ol ruhani tozudyŋ, qatygezdıktıŋ artqanyn atap ötıp, būǧan tūrmystyq qiyndyqtar, tärbienıŋ älsıreuı jäne äleumettık jelıdegı terıs aqparattar yqpal etıp otyrǧanyn aitty. Būl rette tärbie jūmysyn küşeitudı, jas ūrpaqtyŋ boiyna meiırım, ädılettılık pen memleketşıldıktı nasihattaityn kontenttı damytu qajettıgıne toqtaldy. «Tärbie tal besıkten degendei, Qazaqstandaǧy multfilmnen kinoǧa, balabaqşadaǧy taqpaqtan romandarǧa deiın adamdardyŋ boiyndaǧy meiırım men bauyrmaldyqty, memleketşıldık pen ädıldıktı nasihattauy kerek. Sonda ǧana bız Qazaq memleketınıŋ bairaǧyn qūlatpai, märtebesın asqaqtatatyn ūrpaq ösıre alamyz. Qazaq memleketınıŋ materialdyq emes qūndylyqtaryn qaita tügendep, ony jastardyŋ sanasyna sıŋıru – bızdıŋ mındetımız», — dep qorytyndylady ol.