Memleket basshysy Qasym-Jomart Toqaev Qazaqstannyń biryńǵaı ýaqyt beldeýine kóshýi týraly aıtty. Bul týraly ol Býrabaıda ótken quryltaıda málimdedi, dep habarlaıdy “Adyrna” ulttyq portaly.
"Endi biryńǵaı ýaqyt beldeýine kóshýge qatysty pikirtalasqa toqtalaıyn. Úkimet pen Parlament bul máseleni talqylady. Arnaıy zertteýler júrgizildi, sheshimge kúmán keltirgen qoǵam belsendileriniń qaýpi men kúmán-kúdigi rastalǵan joq.
Úkimettiń jáne depýtattardyń basym kópshiliginiń, sondaı-aq mamandardyń ýájimen kelisemin: bizdiń keń-baıtaq jerimiz bar, halqymyzdyń sany da salystyrmaly túrde alǵanda kóp emes. Sondyqtan elimizde biryńǵaı ýaqyt beldeýi bolýǵa tıis. Bul tásil memleketti basqarý isin jeńildetedi, logıstıka men kóptegen bıznes-úderisti ońtaılandyrýǵa septigin tıgizedi. Osymen pikirtalasty doǵarý qajet dep oılaımyn, onyń ústine bul máseleni saıasılandyrýdyń qajeti joq", - dedi Prezıdent Ulttyq quryltaı otyrysynda.
