Mańǵystaý oblysynda munaı men emdik-mıneraldy sý ken oryndaryn ashqan ǵalym Oleg Gershtanskıı ómirden ótti. Qaıǵyly habardy Energetıka mınıstrligi jetkizdi, dep habarlaıdy «Adyrna» tilshisi.
«Energetıka mınıstrliginiń basshylyǵy men ujymy Qazaqstan Respýblıkasy munaı-gaz salasynyń kórnekti qaıratkeri, tehnıka ǵylymdarynyń doktory, Mańǵystaý oblysyndaǵy munaı jáne emdik-mıneraldy sý ken oryndaryn alǵash ashqan Oleg Sergeevıch Gershtanskııdiń mezgilsiz qaıtys bolýyna baılanysty týǵan-týystary men jaqyndaryna qaıǵyryp kóńil aıtady. Oleg Gershtanskııdiń búkil ǵumyry – Respýblıkaǵa, óz isine adaldyq pen senimine degen myzǵymas beriktiktiń jarqyn úlgisi. Oleg Sergeevıch jarqyn ǵumyr keshti, árdaıym belsendi azamattyq ustanymda boldy, ony tereń adamgershilik qasıetteri, joǵary kásibıligi jáne óz isine degen adaldyǵy erekshelendirdi. Oleg Sergeevıchtiń jarqyn beınesi júregimizde máńgi saqtalady, al onyń eńbekteri bolashaq urpaqtyń jadynda qalady. Onyń otbasy men jaqyndaryna osyndaı aýyr qaıǵyǵa baılanysty kóńil aıtamyz»,— delingen kóńil aıtý jedelhatynda.
Oleg Gershtanskıı 1978 jyldan bastap ómiriniń sońyna deıin munaı-gaz salasynda túrli laýazymdarda eńbek etip, Qazaqstannyń energetıkalyq sektoryna aıtarlyqtaı úles qosqan.
Ǵalym Qazaqstan munaıshy-geologtar qoǵamynyń múshesi, Energetıka mınıstrliginiń janyndaǵy Kómirsýtek ken oryndaryn barlaý jáne ıgerý jónindegi ortalyq komıssııasynyń múshesi, sondaı-aq «KAZENERGY» qaýymdastyǵynyń Ǵylymı-tehnıkalyq keńesiniń quramynda bolǵan. Ol 100-den astam ǵylymı maqalanyń, 82 ónertabystyń jáne 5 monografııanyń avtory.
