Qostanai oblystyq tarihi-ölketanu muzeiınıŋ qūrylǧanyna biyl 100 jyl toldy. Ǧasyrlyq tarihy bar mädeni oryn qūndy jädıgerlerge bai. Solardyŋ bır parasyn muzei qyzmetkerlerı jūrtşylyq nazaryna ūsyndy, dep jazady «Habar» arnasynyŋ saity.
«Muzeidegı seruen» dep atalatyn şara barysynda ötken ǧasyrǧa saiahat jasaldy. Sol kezeŋdegı kiım ülgılerın kigen qyz-jıgıtter, tūrmys-salt jabdyqtary, as-taǧam mäzırı jergılıktı halyqtyŋ köne tırlıgın köz aldyŋa äkeledı. Qolöner tuyndylarynyŋ järmeŋkesı, türlı ūlttyq oiyndar, sirk qoiylymdary jinalǧan jūrtşylyqtyŋ köŋılın köterdı. Muzei qyzmetkerlerınıŋ aituynşa, mūndai şaralar ölke tarihyna tereŋ üŋılıp, ruhani mädenietın jete tanuǧa ülken sep bolmaq.
