Reseı prezıdenti Vladımır Pýtın Aqtaý mańynda qulaǵan Azerbaijan Airlines (AZAL) áýekompanııasynyń jolaýshy ushaǵy apatyna baılanysty málimdeme jasaýdy josparlap jatqan joq. Bul týraly memleket basshysynyń baspasóz hatshysy Dmıtrıı Peskov aıtty, dep habarlaıdy «Adyrna» tilshisi The Moscow Times basylymyna silteme jasap.
«Aldaǵy ýaqytta apat taqyrybyna qatysty málimdeme jasaý josparda joq»,—dep qysqa jaýap berdi ol.
Buǵan deıin Ázerbaıjan prezıdenti Ilham Álıev Reseıden kinásin moıyndaýdy jáne osy oqıǵaǵa kinálilerdi jazalaýdy talap etken edi. Sondaı-aq BAQ-ta eldiń Reseıdi halyqaralyq sotqa berýge daıyndalyp jatqany týraly aqparat taraǵan bolatyn.
Eske salaıyq, Embraer ERJ 190-100 jolaýshy ushaǵy byltyr 25 jeltoqsanda Aqtaý qalasy mańyna qulady. Apat saldarynan qaza tapqan 38 adamnyń altaýy – Qazaqstannyń, 25 adam – Ázerbaıjannyń, jeteýi - Reseı azamattary.
