Meksıkanyń ońtústiginde senbi kúni tańerteń jol apaty oryn alyp, 41 adam qaza tapty, dep habarlaıdy "Adyrna" ulttyq portaly.
Bul týraly Tabasko shtatynyń bıligi málimdep, qutqarý jumystary áli jalǵasyp jatqanyn aıtty.
48 adam otyrǵan avtobýs júk kóligimen soqtyǵysqan. Apatta 38 jolaýshy, eki júrgizýshi jáne júk kóliginiń júrgizýshisi qaza tapqan. Avtobýs Kankýn — Tabasko marshrýty boıynsha júrgen. Reuters málimetinshe, avtobýs tolyǵymen órtenip, tek metall jaqtaýy qalǵan.
Tabasko qaýipsizdik qyzmetiniń derekkózderi qazirgi ýaqytta tek 18 máıittiń tabylǵanyn aıtty. Kóptegen máıitter áli tanylmaǵandyqtan, izdeý jáne qalpyna keltirý jumystary jalǵasýda.
Tabasko gýbernatory Haver Meı Rodrıges apat Eskarsega mańynda bolǵanyn habarlady. Ol shtatynyń bıligi federaldyq bılikpen jáne Kampeche bıligimen birge barlyq qajetti kómek kórsetý úshin jumys istep jatqanyn atap ótti.
