Almaty qalasy kıtaphana salasynda innovasiialyq şeşımderdı belsendı engızudı jalǧastyruda. Şahar äkımı Erbolat Dosaevtyŋ tapsyrmasy boiynşa megapolistıŋ qoǧamdyq oryndarynda alǧaş ret oqyrmandarǧa kıtap ūsynatyn zamanaui avtomattar ornatyldy.
Osyndai 24 derbes kıtaphana toǧyz metro stansiiasynda paida boldy: «Raiymbek batyr», «Jıbek joly», «Almaly», «Abai», «Baiqoŋyr», «Mūhtar Äuezov», «Alatau», «Sairan» jäne «Mäskeu», sondai-aq Medeu jäne Äuezov audandarynyŋ HQKO-tarynda, «Sputnik», «Atakent», «Aziia parkı» syndy sauda ortalyqtarynda, Medeu jäne Türksıb audandaryndaǧy jastar komiuniti ortalyqtarynda jäne Sail kovorkingınde ornatyldy.
Avtomatty qondyrǧylardyŋ kömegımen oqyrmandar dästürlı kıtaphanaǧa barmai-aq kıtaptardy taŋdap alyp, bırneşe kün boiy oqi alady. Oqyp bolǧan soŋ ädebietterdı 24 apparattyŋ kez kelgenıne nemese qalalyq kıtaphanalar filialyna qaitara alady. Ol üşın oqu biletı boluy kerek. Eger ol bolmasa, sız tırkeuden ötıp, «Qala oqyrmandary klubyna qosyla alasyz».
Qajet bolǧan jaǧdaida är azamat «Almaty kıtaphanalaryna» qarasty 28 filialdyŋ bırınen oqyrman biletın ala alady, onyŋ üşeuı täulık boiy jūmys ısteidı.
Aita keterlıgı, kıtap oqyǧandy jaqsy köretınder almatylibrary.kz saityn paidalanyp, qajettı kıtaptardy taŋdap, tapsyrys berıp, olardy onlain rejimde oqi alady. Bereşek pen boryşkerlerdı avtomatty türde esepke alu üşın qaitaru merzımderın qadaǧalau jüiesı engızıldı.
«Bız oqyrmandar üşın eŋ qolaily jaǧdai jasap, ozyq şeşımderdı engızıp jatyrmyz. Ötken jyly bırneşe jaŋa kıtaphana aşyldy, būl jūmys 2025 jyly da jalǧasady. Jalpy, qazır qala tūrǧyndary üşın äkımdıkke qarasty 28 kıtaphana jäne qoǧapdyq oryndarda 24 derbes kıtaphana-apparaty jūmys ıstep tūr. Bız qalanyŋ ärbır tūrǧyny kıtap oqyǧanyn, bılımge ūmtylǧanyn qalaimyz. Būl üşın kıtaphanalar tıptı jer astynda – metro stansiialarynda da qoljetımdı. Kıtaphana salasyn damytu mäselesı qala äkımınıŋ erekşe baqylauynda»,- dep atap öttı Almaty qalasynyŋ Mädeniet basqarmasy.
Jalpy, Almaty mädeniet basqarmasyna qarasty kıtaphanalardyŋ jūmysy avtomattandyrylǧan. 1,3 millionnan astam kıtapty qūraityn bükıl kıtap qorynyŋ bıryŋǧai esebı qūryldy. Qyzmetkerler elektrondy katalog jürgızedı, ädebietterdı kım qaşan alǧanyn qadaǧalau jüiesı engızılgen, būl qyzmet körsetudı edäuır jyldamdatady. Kıtaptar men olardyŋ qol jetımdılıgı turaly barlyq aqparat bıryŋǧai mälımetter bazasynda qol jetımdı, al kıtap qoryn paidalanu statistikasy qyzmetkerlerge ädebietke degen sūranysty taldauǧa kömektesedı.
Aitpaqşy, 2024 jyly qalalyq kıtaphanalarǧa 3 millionnan astam kelu körsetkışı tırkelgen. Qala kıtaphanalarynyŋ 95%-y jaŋǧyrtylǧan. Är kıtaphanada jihaz jäne materialdyq-tehnikalyq baza jaŋartyldy, İnternetke qoljetımdılık qamtamasyz etıldı, sondai-aq älemdık standarttarǧa säikes şeşımder engızıldı.
