Jańa jyl merekeleri aldynda óńirde saltanatty sharalar ótetin nysandarda órt qaýipsizdigin qamtamasyz etý maqsatynda keshendi is-sharalar júrgiziledi. Bul sharalardyń aıasynda 544 nysan tirkeýge alyndy. Bul týraly brıfıng barysynda Aqmola oblysynyń TJD Órt qaýipsizdigi basqarmasynyń orynbasary, azamattyq qorǵaý polkovnıgi Erjan Ǵabbas málimdedi, dep habarlaıdy Óńirlik kommýnıkaııalar qyzmetinen.
Tirkeýge alynǵan nysandardyń arasynda 446 bilim berý mekemesi, 34 mádenıet úıi, 6 oıyn-saýyq ortalyǵy, 3 áleýmettik nysan, 14 ortalyq alańdaǵy nysan jáne 41 dámhana men meıramhana bar.
«Injenerlik-ınspektorlyq quramnyń mamandary bul nysandardy órt qaýipsizdigi erejeleriniń saqtalýyn tekserý maqsatynda vızýaldy baqylaýdan ótkizdi. Tekserý barysynda 154 buzýshylyq anyqtalyp, olardyń barlyǵy sol jerde joıyldy», - dedi órt qaýipsizdigi basqarmasynyń orynbasary.
Jańa jyldyq merekelerdiń qaýipsiz ótýin qamtamasyz etý úshin 102 adamnan turatyn 20 jedel top qurylyp, 15 birlesken oqý-jattyǵý ótkizildi, onyń ishinde órt sóndirý boıynsha taktıkalyq sabaqtar da boldy. Merekelerge qatysatyn nysandan úshin 313 jedel jospar men órt sóndirý nusqaýlyqtary qaıta qaraldy.
Sonymen qatar, profılaktıkalyq sharalar aıasynda 89 reıd júrgizilip, 279 pırotehnıkalyq ónim tárkilendi. Zańsyz pırotehnıkalyq saýdamen aınalysqan tulǵalarǵa qatysty 38 ákimshilik hattama toltyrylyp, 1,7 mıllıon teńgeden astam aıyppul salyndy.
19 jeltoqsan kúni «Atameken» kásipkerler palatasynda dámhana, meıramhana jáne klýbtardaǵy sharalar barysynda órt qaýipsizdigin qamtamasyz etý máseleleri talqylanǵan dóńgelek ústel ótti. Memlekettik organdar men jeke bıznes ókilderi mereke kezinde qaýipsizdikti qamtamasyz etý boıynsha usynystar aldy.
«Barlyq oblys turǵyndaryna jańa jyl merekesi kezinde órt qaýipsizdigi erejelerin saqtaý mańyzdy ekenin eske salǵym keledi. Jańa jyldyq shyrshany ornatqanda, ony jylytý quraldarynan jáne qyzdyrǵyshtardan alys jerde ornalastyryp, ony senimdi túrde tireý kerek. Shyrshany naǵyz shamdarmen jáne jeńil tutanatyn áshekeılermen, mysaly, qaǵaz gırlıandalarymen nemese qar ushqyndarymen bezendirýge bolmaıdy. Áshekeıler úshin tek elektr gırlıandalaryn qoldanǵan durys. Sondaı-aq pırotehnıkalyq buıymdardy sapa sertıfıkattarymen jáne nusqaýlyqtarymen satyp alý mańyzdy, olardy tek ashyq aýada, ǵımarattardan qaýipsiz qashyqtyqta paıdalaný qajet», - dep atap ótti spıker.
Aıta ketý kerek, jyl saıyn oblys aýmaǵynda pırotehnıkalyq buıymdardy paıdalaný saldarynan órt oqıǵalary oryn alady. Qarapaıym qaýipsizdik erejelerin saqtaý arqyly merekeni barshaǵa qaýipsiz ótkizýge bolady.
