2022-2024 jyldary Almaty turǵyndarynyń ótinishi boıynsha jalpy somasy 39,1 mlrd teńgege 938 joba iske asyryldy. Bul týraly Ortalyq kommýnıkaııalar qyzmetinde ótken brıfıngte qala ákimi Erbolat Dosaev málimdedi.
Onyń aıtýynsha, bul jobalardyń barlyǵy qala turǵyndary belsendi qatysyp, qalany jaqsartý úshin óz ıdeıalaryn usynatyn «Halyq qatysatyn bıýdjet» baǵdarlamasy boıynsha júzege asyrylǵan.
«Biz HQB aıasynda jobalardy iske asyrýǵa jyl saıynǵy lımıtti 17 mlrd teńge deńgeıinde belgiledik. Sondaı - aq, buryn iske asyrylǵan HQB jobalaryn ustaý úshin birinshi ret ár aýdanǵa 200 mln teńgege deıin qarajat bólinýde», - dedi Erbolat Dosaev.
Baǵdarlama aıasynda qalanyń qaraýsyz qalǵan aýmaqtarynan jańa jaıaý júrginshiler jáne jaǵalaý aımaqtary, skverler, balalar alańdary men abattandyrylǵan aýlalar jasalýda.
Esterińizge sala keteıik, 2022 jyldan bastap «Halyq qatysatyn bıýdjet» baǵdarlamasyn qarjylandyrý 2,6 esege ulǵaıdy, berilgen jobalar sany 5,7 esege ósti, bul azamattardyń belsendi qatysýyn jáne baǵdarlamany qalany damytý quraly retinde tıimdiligin kórsetedi.
2024 jyly «Halyq qatysatyn bıýdjet» aıasynda aýdan ákimdikteri 364 jobany iske asyrdy. Kelesi jyly Almatyda 17 mlrd teńgege abattandyrý boıynsha 300-den astam jobany iske asyrý josparlanǵan. Jobalardyń basym bóligi Alataý (50) jáne Almaly (45) aýdandarynda iske asyrylatyn bolady. Iske asyrýǵa ruqsat etilgen jobalar tizimimen budget.open-almaty.kz. saıtynda tanysýǵa bolady.
