Memleket basshysy Qasym-Jomart Toqaev qazaqstandyqtardy Táýelsizdik kúnimen quttyqtady. Bul týraly búgin, 16 jeltoqsanda Aqordanyń baspasóz qyzmeti aıtty, dep habarlaıdy «Adyrna» tilshisi.
«Qurmetti otandastar! Sizderdi Táýelsizdik kúnimen quttyqtaımyn! Bul – halqymyzdyń azattyq týraly armany aqıqatqa aınalyp, eldik dástúrlerimiz jańǵyrǵan kún. Osy mereıli merekede bárimiz babalar amanatyna árdaıym adal bolýdyń jáne ult bolashaǵyna zor jaýapkershilikpen qaraýdyń mán-mańyzyn tereń túsinemiz. Sebebi táý eter Táýelsizdigimiz – barshaǵa ortaq qundylyq ári barlyq ıgiligimizdiń bastaýynda turǵan baǵa jetpes baılyq. Táýelsizdigimizden bıik esh nárse joq. Ony kózdiń qarashyǵyndaı qorǵaý – ár azamattyń perzenttik paryzy»,—dedi ol.
Prezıdent elimizdiń álemdik arenadaǵy ornyn atap ótti.
«Búginde Qazaqstan halyqaralyq deńgeıdegi abyroı-bedeli joǵary, strategııalyq baǵdary aıqyn memleket retinde bolashaqqa nyq senimmen qadam basyp keledi. Halqymyz buǵan eseli eńbek pen yrysty yntymaqtyń arqasynda qol jetkizdi. Biz osy berekeli birligimizdi, qoǵamdaǵy tynyshtyq pen turaqtylyqty saqtaı otyryp, qıyndyqtyń bárinen súrinbeı ótemiz. Táýelsiz elimiz órkenıetti, ozyq memleket retinde damı beredi. Barshańyzǵa zor densaýlyq, mol tabys tileımin! Qasterli Otanymyz ósip-órkendeı bersin!»— dep tolyqtyrdy Qasym-Jomart Toqaev.
