Parlament depýtattary múddeli memlekettik organdarǵa biryńǵaı ýaqyt beldeýi máselesine qatysty ǵylymı-zertteý jumysyn aldaǵy jyldyń naýryz aıyna deıin aıaqtaýdy tapsyrdy. Bul týraly Májilis Spıkeri, «AMANAT» partııasynyń Tóraǵasy Erlan Qoshanov Úkimet músheleriniń qatysýymen ótken frakııanyń keńeıtilgen jıynynda aıtty.
Belsendi pikir almasý barysynda Májilis depýtattary Úkimet múshelerine biryńǵaı ýaqyt beldeýin engizýge qatysty azamattardy tolǵandyrǵan ózekti saýaldardy jetkizdi. Atap aıtqanda, májilismen J. Áshimjanov Almaty oblysynyń, Jetisý oblysynyń jáne ózge de óńirlerdiń turǵyndarynan depýtattyq korpýs atyna kelip túsken kóp ótinishke nazar aýdardy. Depýtat E. Saırov úılesimdi qoǵam qurý úshin Parlament pen Úkimettiń osy másele boıynsha birtutas ustanymy bolýǵa tıis ekenin málimdedi. Depýtat Iý. Kýchınskaıa mundaı másele Úkimet qaýlysy deńgeıinde sheshilmeı, zań deńgeıinde rettelýi kerek degen pikir bildirdi.
Depýtattar R. Zaıtov, U. Týmashınov, N.Sabılıanov, E. Jańbyrshın, B. Nájimetdınuly, N. Dementeva, D. Muqaev jáne taǵy da basqalar óz oı-pikirleri men usynystaryn bildirdi. Sondaı-aq, Saýda jáne ıntegraııa mınıstri Arman Shaqqalıev, Ǵylym jáne joǵary bilim mınıstri Saıasat Nurbek, Densaýlyq saqtaý mınıstri Aqmaral Álnazarova baıandama jasady.
Frakııa jıynyn qorytyndylaı kele Májilis Spıkeri ýaqyt beldeýin ózgertý – qoǵamda eń kóp talqylanatyn taqyryptyń biri ekenin atap ótti. Ol mundaı sheshimderdi aldyn-ala egjeı-tegjeıli taldaý jáne keńinen talqylaý arqyly qabyldaý kerek ekenin jetkizdi. Bul qadam qoǵamǵa tıimdi túsindirý jumysyn júrgizýge múmkindik beredi. Osyǵan baılanysty, Úkimet biryńǵaı ýaqyt beldeýine kóshýdiń áseri týraly kópfaktorly ǵylymı-zertteý jumysyn júrgizý jóninde sheshim qabyldady. Atalǵan sheshim birqatar suraqtyń jaýabyn berýge tıis.
«Ýaqyttyń ózgerýi, eń aldymen, azamattarymyzdyń densaýlyǵy men ál-aýqatyna, turmysyna qalaı áser etetinine qatysty naqty jaýap alýymyz kerek. Osy máselege bas mán berý qajet. Sonymen qatar, Úkimet aıtyp otyrǵan úsh jyl – tym uzaq merzim dep esepteımin. Zertteý jumysyn úsh aıda aıaqtaǵandaryńyz jón. Aldaǵy jyldyń naýryz aıynda zertteý qorytyndylarymen jáne naqty sheshý joldary bar usynystarmen kelesizder degen úmittemiz»,– dedi Erlan Qoshanov Úkimet múshelerine qarata aıtqany sózinde.
«AMANAT» partııasynyń baspasóz qyzmeti
Sýretti túsirgen: Álı Ǵalym
