Toqaevtyń tapsyrmasynan keıin el bıýdjeti 200 mlrd teńgeden qaǵylmaq

944

Mıkro jáne shaǵyn bıznesti tabys salyǵynan bosatqannan keıin el bıýdjeti 200 mıllıard teńgeden qaǵylady. Alaıda úkimet bul shyǵyndy salyqtyq jáne kedendik ákimshilendirýdi jaqsartý esebinen qaıtarýdy kózdep otyr. Bul týraly búgin premer-mınıstrdiń birinshi orynbasary – qarjy mınıstri Álıhan Smaıylov málimdedi, dep habarlaıdy adyrna.kz ulttyq portaly Sputnik Qazaqstan saıtyndaǵy málimetterdi negizge ala otyryp. 

Qarjy mınıstriniń aıtýynsha, byltyr mıkro jáne shaǵyn bıznesten memlekettik bıýdjetke 190 mıllıard teńgege tarta salyq túsken.

Bql jóninde Smaıylov myrza: "2020 jyly, eger biz osyndaı kompanııalar men jeke kásipkerlerdi salyqtan bosatsaq, bıýdjet shyǵyny 200 mıllıard teńgeden asady. Biraq, biz bul shyǵyndy salyqtyq jáne kedendik ákimshilendirýdi jaqsartý esebinen qaıtarýdy josparlap otyrmyz", - dep málimdedi.

Al qarjy mınıstri: "Salyq zańnamasyna sáıkes, 15 adam jumys isteıtin jáne jyldyq tabysy 30 myń AEK-ke deıin nemese 76 mıllıon teńgeni quraıtyn jeke kásipkerler, zańdy tulǵalar mıkrobızneske jatady. Al 100 adamǵa deıin jumysshysy bar, jyldyq tabysy 300 AEK-ke deıin nemese jylyna 757 mıllıon teńgeni quraıtyn uıymdar shaǵyn bıznes sanalady", - dep qandaı kásipkerler tabys salyǵynan bosatylatynyn túsindirip ótti.

Esterińizge salaıyq, Qazaqstan prezıdenti 2 qyrkúıekte jarııa etken joldaýynda úkimetke mıkro jáne shaǵyn bıznesti úsh jylǵa tabys salyǵynan bosatý týraly zań jobasyn ázirleýdi tapsyrǵan bolatyn.

"Adyrna" ulttyq portaly

Pikirler