Tótenshe jaǵdaılar mınıstrligi 2024 jylǵy 21 qarashada elimizdiń barlyq aımaqtarynda azamattyq qorǵanys júıesiniń dabyl sırenalary iske qosylatynyn málimdedi, dep habarlaıdy "Adyrna" ulttyq portaly.
Bul shara respýblıkalyq «Qys-2024» komandalyq-shtabtyq oqý-jattyǵýyna baılanysty ótkiziledi. Oqý-jattyǵýlar 21-22 qarasha aralyǵynda uıymdastyrylady. Al respýblıkalyq shtab Aqmola oblysynyń Kókshetaý qalasynda ornalasady.
Mundaı sharalar azamattyq qorǵanys júıesiniń jumysqa daıyndyǵyn tekserý jáne tótenshe jaǵdaılar kezinde halyqty jedel aqparattandyrý maqsatynda ótkiziledi. Mınıstrlik bul tekserý josparly sıpatta ekenin jáne halyqqa qaýip tóndirmeıtinin atap ótti. Turǵyndar dabyl kezinde sabyr saqtap, resmı aqparatty telearnalar men radıodan tyńdaýy qajet.
