Prezıdent Qasym-Jomart Toqaev Serbııaǵa resmı saparmen bardy. Bul týraly búgin, 18 qarashada Aqordanyń baspasóz qyzmeti jazdy, dep habarlaıdy «Adyrna» tilshisi.
Memleket basshysyn Belgrad áýejaıynda Serbııa prezıdenti Aleksandr Výchıch qarsy aldy.
«Qazaqstan prezıdentiniń bortyn Serbııa aspanynda osy eldiń áskerı áýe kúshteriniń ushaqtary alyp júrdi. Sapar barysynda joǵary deńgeıdegi kelissózder ótedi. Memleketter basshylary eki eldiń saıası, saýda-ekonomıka, kólik-logıstıka jáne mádenı-gýmanıtarlyq salalardaǵy ózara yntymaqtastyǵynyń perspektıvalaryn talqylaıdy»,—delingen habarlamada.
Kelissózder qorytyndysy boıynsha ekijaqty kelisimderge qol qoıylmaq. Sonymen qatar Serbııanyń premer-mınıstri Mılosh Výchevıchpen kezdesý josparlanǵan.
