Kelesi Ulttyq quryltaı Býrabaıda ótetin boldy. Bul týraly búgin Aýyl sharýashylyǵy eńbekkerleriniń birinshi forýmynda prezıdent Qasym-Jomart Toqaev málim etti, dep habarlaıdy “Adyrna” ulttyq portaly.
Prezıdent osy quryltaıda Qazaqstandy odan ári damytýǵa qatysty tyń josparlardy jarııa etpek.
«Burynǵy jospardyń bárin qazirgi kúnniń talabyna laıyqtap, túzetý qajet. Men buǵan deıin reformalar toqtap qalmaıtynyn naqty aıttym. Óıtkeni elimizdi jan-jaqty jańǵyrtý isi úzdiksiz jalǵasa berýge tıis. Aldymyzda aýqymdy jumys tur. Soǵan saı jańa bastamalar men josparlardy júzege asyramyz. Qazir onyń bári muqııat zerdelenip jatyr. Kelesi jyly halyqqa usynatyn bolamyn. Keıbir bastamany ádettegideı Ulttyq quryltaıda jarııalaımyn. Onyń kezekti otyrysy Býrabaıda ótedi. Qalǵanyn Joldaýda aıtamyn», - dedi Toqaev búgingi forýmda.
Onyń aıtýynsha, Ádiletti Qazaqstandy qurý jolynda áli de kóp jumys isteý qajet.
«Ol úshin jalpyulttyq biregeıligimizdiń negizin udaıy nyǵaıtyp, memlekettik basqarýdyń tıimdiligin arttyryp, ekonomıkany dáıekti túrde damytý kerek. Eldik maqsattarymyzdyń kókjıegin kóre bilý mańyzdy. Sonda ǵana aldymyzǵa qoıǵan strategııalyq mindetterdiń baǵytynan aýytqymaımyz. Bos áńgimeler men ónbes daýlardy qýmaı, bolashaqqa senimmen qadam basýymyz kerek. Batyl bastamalarymyzdy birge júzege asyratynymyzǵa senimdimin», - deıdi prezıdent.
