Prokýror Aıjan Aımaǵanova QHA Analar forýmynda sóz sóılep, halyqty «Tártipti ózińnen basta!» akııasyn bastaýǵa shaqyrdy.
Ol aldymen Qazaqstan halqy Assambleıasy janyndaǵy Analar keńesiniń 10 jyldyq mereıtoıymen quttyqtap, mańyzdylyǵy týraly aıtty.
«Osy 10 jyl ishinde Analar keńesi elimizdegi bedeldi qoǵamdyq ınstıtýttardyń birine aınaldy. Uıymnyń óńirlerde óz kóshbasshylary men qoldaýshylary qalyptasty. Búginde olardyń basyn biriktiretin bir ǵana múdde bar. Ol – ulttyń saýlyǵy men tárbıesi, yntymaǵy men birligi. Sizderdiń otbasy ınstıtýtyn saqtaý men nyǵaıtýǵa, óskeleń urpaqty tárbıeleýge, jastar arasyndaǵy quqyq buzýshylyqtyń aldyn alýǵa arnalǵan bastamalaryńyzdyń mańyzyn erekshe atap ótkim keledi. Analar keńesiniń músheleri árqashan qoǵamdaǵy ózekti máselelerge ún qosyp, ony sheshýge belsene qatysýda. Onyń ishinde quqyqtyq tárbıe berý máselesi de bar» – dedi ol.
Sonymen qatar, sońǵy ýaqytta jastar arasyndaǵy quqyq buzýshylyqtyń kóbeıgenin aıtyp, zorlyq-zombylyq, vandalızm, buzaqylyq faktileri, balalarǵa qatysty qylmystardyń artýy alańdatatyn másele ekenin eske saldy.
«Men prokýratýra qyzmetkeri retinde kún saıyn osyndaı isterdiń kýásimin. Bul bizge moraldyq-psıhologııalyq turǵydan óte aýyr. Bir jaǵynan ana retinde aıaǵyn shalys basqan jastardyń bolashaǵyna ýaıymdaımyz, ekinshi jaǵynan zańger retinde janyń aýyrady. Qalaı desek te, zańdy sheshim shyǵaryp, jastardy týra jolǵa salýǵa tyrysamyz. Biraq, nege bizdiń balalar zań buzady? Nege qatygezdik tanytady? Osy oılar kóp mazalaıdy meni, osy oılardan bir túıgenim, otbasynda tárbıe quldyrap tur. «El bolamyn deseń besigindi túze» dep aıtqan Muhtar Áýezov. Endeshe, otbasyna bet buraıyq» - dedi Aıjan Aımaǵanova.
