Bilim kúni qarsańynda Jambyl oblysynda 5 mektep paıdalanýǵa berildi, dep habarlaıdy adyrna.kz ulttyq portaly oblys ákiminiń baspasóz qyzmetine silteme jasap.
Bes mekteptiń biri Jambyl aýdanyna qarasty Birlesý-Eńbek aýylyndaǵy 140 oryndyq orta bilim berý mekemesi. Bilim kúnine oraı ashylǵan oqý ornynyń Alǵashqy qońyraý saltanatty sharasyna aımaq basshysy Asqar Myrzahmetovtyń ózi qatysyp, mekeme ujymy men oqýshylaryna jańa oqý jylynda jańa jetistikter men sáttilik tiledi.
Birlesý-Eńbek orta mektebi demografııalyq ósimge baılanysty oryn tapshylyǵyn joıý maqsatynda jańadan boı kóterip otyr. Jańa bilim mekemesinde balalardyń sapaly bilim alýlaryna barlyq jaǵdaı jasalǵan. Mektepte 18 oqý qabıneti, sport zaly, májilis zaly, ashana, 2 kompıýterlik synyp, robototehnıka jáne jańa modıfıkaııalyq kabınetter bar. Bıyl mektepte barlyǵy 250 oqýshy 2 aýysymda oqymaq. Onda 39 pedagog qyzmet etse, onyń 12,5 paıyzy jas mamandar.
Aıta keteıik, jambyldyqtar jańa oqý jylyn jańa leppen bastamaq. Óńirde jyl saıyn jańa mektep pen balabaqshalar qurylysy qarqyn alyp keledi desek, búgingi Alǵashqy qońyraý kúni oblys boıynsha 5 mekteptiń paıdalanýǵa berilip otyrǵandyǵy sonyń aıǵaǵy. Onyń 1-ýi úsh aýysymdy, 1-ýi apatty jáne 3-ýi oryn tapshylyǵy bar mekteptiń máselesin sheship otyr. Qazirgi tańda óńirdegi úsh aýysymdy mektepterdiń másele túıini tolyǵymen tarqatylǵan.
Sonymen qatar jyl sońyna deıin taǵy da 4 nysan paıdalanýǵa beriledi. Qalǵan apatty jáne oryn tapshylyǵy bar mektepterdiń qurylysyn júrgizýge oblystyq bıýdjetten qarjy bólinip, máselesi kezeń-kezeńimen sheshiletin bolady. Bıyl oblystyń bilim júıesin qarjylandyrýǵa 130 mıllıard teńge bólinse, bul ótken jylmen salystyrǵanda 22,2 mıllıard teńgege artyq. Onyń 5,1 mıllıard teńgesi bilim berý nysandarynyń qurylysy men kúrdeli jóndeýge qarastyrylǵan. Búginde 15 bilim nysanynyń qurylysy júrgizilýde.
Bıyl Jambyl oblysynda birinshi synypqa 28 myń oqýshy qabyldandy. Al respýbıka boıynsha 400 myńnan astam bala mektep tabaldyryǵyn attady. Jalpy jyl ótken saıyn birinshi synypqa baratyn oqýshylardyń sany artyp keledi. 2016 jyly 1-synypqa barǵan balalardyń 89 paıyzy qazaq mektebin tańdaǵan. Bul kórsetkish sońǵy 3 jyldan beri kóbeımese azaıǵan joq dep senemiz.
«ADYRNA»
ulttyq portaly
