Qyrǵyzstan prezıdenti Sadyr Japarov «Jerleý jáne jerleý isteri týraly» zańdy júzege asyrý sharalary boıynsha jarlyqqa qol qoıdy. Bul týraly prezıdenttiń baspasóz qyzmeti jarııalady, dep habarlaıdy “Adyrna” ulttyq portaly.
Qaýlyda Qyrǵyzstan Musylmandary Dinı Basqarmasyna eskertkishter, músinder, qulpytastardy, qorshaýlardy salýǵa jáne ornatýǵa tyıym salatyn pátýa (qaýly) shyǵarý usynyldy. Tarıhı-mádenı mańyzy bar jerleý oryndaryna erekshe jaǵdaı jasalýy múmkin.
«Sharıǵat boıynsha musylmanǵa baǵaly tas túrlerin ornatýǵa jáne qabir basyna fotosýret qoıýǵa, ony temir qorshaýlarmen qorshaýǵa, ement pen betondy paıdalanýǵa tyıym salynady. Mundaı ádet-ǵuryptar marqumǵa kómektespeıdi. Kerisinshe, órtengen materıaldardy paıdalaný jáne qabirdiń ústine shatyr salý marqumnyń rýhyna azap ákeledi», - dedi Japarov shildede «Kabar» agenttigine bergen suhbatynda.
Japarov jerlesterin zırattarǵa metall jáne tas eskertkishter ornatýdy toqtatýǵa shaqyrdy.
«Keıbir saıasatkerlerdiń ne aıtatyny maǵan báribir. Marqumdardy eske alý úshin úıde kúnde olarǵa Quran oqýǵa nemese alys bolsań da eske alýǵa bolady. Bul jetkilikti. Sonda marqum baqytty bolady. Metall eskertkishter nemese eki qabatty keseneler ornatý bizdiń dástúrimizge jatpaıdy», - dedi ol.
Qaýlyǵa sáıkes, qabir tastary men qorshaýlar aǵash materıaldardan jasalyp, bıiktigi 0,7 metrden aspaýy tıis. Mundaı sharalar beıit eskertkishterin salý kezinde ysyrapqa jol bermeýge kómektesedi.
Musylmandar dinı basqarmasyna, Din isteri jónindegi memlekettik komıssııaǵa, prezıdenttiń oblystardaǵy ókiletti ókilderine, jergilikti bılik organdaryna jáne basqa da birqatar qurylymdarǵa marqumdy jerleý máseleleri boıynsha halyq arasynda turaqty túrde túsindirý jumystaryn júrgizý tapsyryldy.
Sáýlet, qurylys jáne turǵyn úı-kommýnaldyq sharýashylyq isteri agenttigine úsh aı merzimde qala qurylysy qujattamasyn, ornalastyrýǵa, jobalaý men abattandyrýǵa, paıdalaný men kútip ustaýǵa qoıylatyn ekologııalyq, sanıtarlyq talaptardy retteıtin úlgi erejelerdi (nusqaýlardy) ázirleý jáne bekitý tapsyryldy.
