Ulytaý oblysynyń ákimshilik ortalyǵy - Jezqazǵan qalasynyń qurylǵanyna 70 jyl. Aıryqsha mereıtoı qurmetine oraı mysty óńir tórinde ornalasqan Serke Qojamqulov atyndaǵy qazaq mýzykalyq-drama teatrynda saltanatty is-shara ótti. Jıynda Ulytaý oblysynyń ákimi Berik Ábdiǵalıuly turǵyndar men qala qonaqtaryna quttyqtaýyn jetkizdi.
«Jyl saıyn qala merekesi atalyp ótkende biz qazynaly Qarsaqbaı men Baıqońyr kómir oshaǵyn, Úlken Jezqazǵan jumysshy kentiniń tirligi men Jezdiniń tarıhı orynyn únemi eske alyp otyramyz. Óıtkeni Qarsaqbaıdyń qara mysy men Jezdiniń marganei, Baıqońyrdyń kómiri men Jezqazǵannyń sary mysy – Ulytaý dalasynyń óndiristi aımaqqa aınalýynyń ózegi. Bul – bir-birinen bólip qaraýǵa bolmaıtyn tutas uǵym.
Jańadan ashylǵan Ulytaý oblysynyń ortalyǵy Jezqazǵan men jezqazǵandyqtardyń osy mindetti oryndaýdaǵy róli de erekshe bolmaq. Óıtkeni Jezqazǵan – Otanymyzdyń tústi metallýrgııasynyń iri oshaǵy, qýatty ortalyǵy. Óziniń 70 jyldyq damý jolynda Jezqazǵan qalasy tarıh tolqynynyń nebir aýyr syndarynan ótti, óndiristi damytýdyń qıyn da kúrdeli synaqtaryn bastan keshirdi. Bárin de túsinip, birine bel býǵan kenshiler men metallýrgterdiń, qurylysshylar men baıytýshylardyń erlik úlgisi qalyptasty. Búgingi jezqazǵandyqtardyń boıynda sol órshildik bar.
Qanysh Sátbaev esimi men Jezqazǵan ataýy qatar aıtylady. Bıyl ǵulama ǵalym Qanysh Imantaıuly Sátbaevtyń týǵanyna 125 jyl toldy. Baıanaýylda týyp, Ulytaýda azamat bolyp qalyptasqan ǵalymnyń toıymen oraılas kelgen Jezqazǵannyń 70 jyldyq torqaly toıy qutty bolsyn»-dedi óńir basshysy óz quttyqtaýynda.
