Oblystyq ákimdikte ótken jıynda jańadan taǵaıyndalǵan basshylardy aımaq basshysy Bolat Baqaýov tanystyrdy. Aqparattyq jáne qoǵamdyq damý basqarmasy ishki saıasat, din jáne jastar saıasaty basqarmalaryn biriktirý arqyly quryldy. Sol sııaqty mádenıet jáne tilderdi damytý basqarmalaryn biriktirý týraly sheshim qabyldanǵan. Aqparattyq jáne qoǵamdyq damý basqarmasyn buǵan deıin Pavlodar oblysy ákimi apparaty basshysynyń orynbasary qyzmetin atqarǵan Baýyrjan Qapenov basqaratyn boldy. Aıta keteıik, Baýyrjan Qapenov buǵan deıin 2011 jyldan bastap 2015 jylǵa deıin oblystyq ishki saıasat basqarmasynyń basshysy qyzmeitn atqarǵan. Ol 1963 jyly týǵan, eki joǵary bilimi bar. 1985 jyly Pavlodar pedagogıkalyq ınstıtýtyn «Orta mekteptiń matematıka jáne fızıka muǵalimi» mamandyǵy boıynsha, 1997 jyly Pavlodar memlekettik ýnıversıtetiniń ekonomıka jáne ınjenerıng ınstıtýtyn ekonomıka jáne menedjment mamandyǵy boıynsha bitirgen.
Mádenıet, tilderdi damytý jáne muraǵat isi basqarmasynyń basshysy Ernur Dáýenov boldy. Buǵan deıin ol eki jyl ishki saıasat basqarmasyn basqarǵan. Ernur Dáýenov 1988 jyly týǵan. 2009 jyly S.Toraıǵyrov atyndaǵy Pavlodar memlekettik ýnıversıtetin «Arheologııa jáne etnologııa bakalavry», 2012 jyly Qaztutynýodaǵy Qaraǵandy ekonomıkalyq ýnıversıtetin «Ekonomıka jáne bıznes» mamandyǵy boıynsha, 2015 jyly Pavlodar memlekettik pedagogıkalyq ınstıtýtyn «Bıologııa» mamandyǵy boıynsha támamdaǵan. Gýmanıtarlyq ǵylym magıstri dárejesi bar.
Al, Aslan Ýrmanov merıtokratııa qaǵıdaty boıynsha osy qyzmetke Pavlodar oblysy boıynsha memlekettik satyp alý basqarmasy jumysynyń memlekettik satyp alý bóliminiń basshysy laýazymynan aýysyp, memlekettik satyp alý basqarmasynyń basshysy bolyp taǵaıyndaldy. Ol 1981 jyly týǵan. 2002 jyly Almaty ekonomıka jáne statıstıka ınstıtýtyn «Býhgalterlik esep jáne aýdıt» mamandyǵy boıynsha, al 2007 jyly Qazaq quqyq jáne halyqaralyq qatynastar ınstıtýtyn «Quqyqtaný» mamandyǵy boıynsha bitirgen.
