Memleketimizdiń sımvolyna aınalǵan rámizder alǵash ret 1992 jyly resmı túrde bekitildi. Sodan beri tórtinshi maýsymda elimizde Qazaqstan Respýblıkasy memlekettik rámizder kúni atap ótiledi. Bul kúnde asqaqtyqtyń belgisi sanalatyn tý, erkindiktiń jarshysy – eltańba, ár sózi jigerge toly – ánuran táýelsizdiktiń nyshanyna aınaldy. Osyndaı ulttyq rýhty oıatyp, jigerlendiretin rámizderimizdi qorǵaý, qasterleý barshamyzǵa mindet.
Qazaqstan Respýblıkasynyń rámizderi – eldiń táýelsizdigin, tarıhyn, mádenıetin, jáne birligin beıneleıtin mańyzdy ulttyq nyshandar. Árbir rámizdiń ózine tán ereksheligi men maǵynasy bar, olar elimizdiń bolashaǵy úshin erekshe oryn alady. Rámizderdi qorǵaý jáne olardy qurmetteý – árbir azamattyń qasıetti boryshy. Qoǵamda rámizderdi nasıhattaý arqyly, ásirese jas býynǵa olardyń mańyzyn túsindirip, qurmet sezimin qalyptastyrý qajet. Bul is-sharalar mektepterde, ýnıversıtetterde jáne memlekettik merekelerde ótkizilse, rámizderge degen qurmet tereńdeı túsedi. Áleýmettik jelilerde jáne buqaralyq aqparat quraldarynda da rámizderdiń mańyzyn túsindiretin sharalar ótkizý bul istiń tıimdi joldarynyń biri.
2023 jyly memlekettik rámizderdi nasıhattaý aıasynda túrli is-sharalar ótti. Solardyń biri – elimizdiń ár aımaǵynda ótken «Meniń Qazaqstanym» patrıottyq forýmy. Jastar arasynda patrıotızmdi damytýǵa jáne rámizderge qurmetti arttyrýǵa baǵyttalǵan is-sharaǵa qoǵam qaıratkerleri, belgili tulǵalar jáne jastar uıymdarynyń ókilderi qatysty. Sondaı-aq, túrli deńgeıdegi bilim berý mekemelerinde rámizderge qatysty aqparattyq sabaqtar ótkizildi. Oqýshylarǵa memlekettik tý, eltańba jáne ánurannyń mán-maǵynasy túsindirilip, arnaıy vıktorınalar men konkýrstar uıymdastyryldy. Memlekettik rámizderge arnalǵan shyǵarmashylyq baıqaýlarmen qatar rámizderdi qurmetteýge shaqyratyn jastar uıymdary men qoǵamdyq birlestikter uıymdastyrǵan fleshmobtar ótkizildi. Mundaı is-sharalar rámizderdi nasıhattap qana qoımaı, olardy qorǵaý tártibin de túsindiredi.
Qazaqstan Respýblıkasynyń zańnamasynda rámizderdi durys paıdalaný men qorǵaý tártibi naqty belgilengen. Memlekettik rámizderdi zańsyz paıdalaný nemese olarǵa qurmetsizdik kórsetý qatań jaýapkershilikke tartylady. Qazaqstan Respýblıkasynyń Konstıtýııasyna sáıkes árbir azamat memlekettik rámizderdi qurmetteýge mindetti.
Ákimshilik quqyq buzýshylyq týraly Qazaqstan Respýblıkasynyń Kodeksi 458-bap boıynsha memlekettik rámizderdi qorlaý nemese durys paıdalanbaý, rámizderge qatysty qurmetsizdik kórsetý, olardy buzýǵa jol bermeý jónindegi talaptardy buzý ákimshilik quqyq buzýshylyq bolyp tabylady. Ony buzǵan jaǵdaıda jeke tulǵalarǵa 200 AEK-ke deıingi aıyppul salynady. Rámizderdi qoǵamdyq oryndarda qorlaǵan jaǵdaıda úsh jylǵa deıin bas bostandyǵynan aıyrý nemese aıyppul salynady.
Bul zańdar memlekettik rámizderge qurmet kórsetýdi jáne olardy durys qoldanýdy qamtamasyz etedi. Al rámizderge zııan keltirgenderge aıyppuldan bastap, qylmystyq jazaǵa deıingi sharalar qarastyrylǵan.
Rámizderdi qorǵaý – árbir azamattyń paryzy. Bul tek qana zańdyq talap emes, ulttyq rýhty kóteretin mańyzdy is-shara, ár azamattyń ar-ojdanyna baılanysty is. Bul – eldiń abyroıyn qorǵaý. Olardy qorǵaı otyryp, biz óz mádenıetimizdi, tarıhymyzdy jáne ulttyq biregeıligimizdi saqtaımyz. Jastar arasynda rámizderdi qurmetteýdi nasıhattaý jáne olardyń mańyzyn túsindirý – bolashaq urpaqtyń elge degen súıispenshiligin arttyrýǵa baǵyttalǵan mańyzdy qadam. Memlekettik rámizderdi durys paıdalaný jáne qorǵaý – eldiń ishki tutastyǵyn saqtaýdyń negizi. Qoǵamda rámizderge degen qurmetti arttyrý, ásirese, jastar arasynda, patrıottyq sezimderdi damytýǵa yqpal etedi. Sondyqtan árbir azamat rámizderge degen qurmetin kúndelikti ómirde kórsete otyryp, bolashaq urpaqqa táýelsizdiktiń mańyzyn nasıhattaýy qajet. Rámizderdi tek bir kórkemdik belgi retinde emes, ulttyq birliktiń nyshany retinde qabyldaý mańyzdy. Osylaısha, árbir qazaqstandyq óz rámizderin qorǵaı otyryp, eldiń abyroıyn asqaqtatady.
Elimizdiń táýelsizdigin aıqyndaıtyn ulttyq maqtanyshtyń kórinisi sanalatyn rámizder tereń maǵynaǵa ıe, olar halyqtyń birligin, táýelsizdikke jetý jolyn jáne ulttyń bolashaqqa degen senimin beıneleıdi. Halyqaralyq arenalarda elimizdiń namysyn qorǵaıtyn sportshylarymyz ben bilim báıgesinde baq synaıtyn árbir qazaqstandyq kók týymyzdy jelbiretip, ánuranymyzdy shyrqatý maqsatynda bar kúshterin salatyny anyq.
