Qaraǵandy oblysynda "Taza Qazaqstan" ekologııalyq akııasy jalǵasýda. Oblys ortalyǵynyń ortalyq saıabaǵynda eriktiler úlken tazalyq sharasyn uıymdastyryp, aýmaqty retke keltirýge kómektesti. Olar qoqys jınady, qurǵaq butaqtardy shyǵardy, kógaldar men jaıaý júrginshiler joldaryn tazartty.
"Taza bolsa tabıǵat, aman bolar adamzat!" akııasyna júzden astam adam qatysty. qalada qorshaǵan ortany jaqsartý úshin stýdentter men oqýshylar, janashyr turǵyndar bas biriktirdi. Eriktiler myń qap qoqys jınady.
Tazalyq sharasyna qatysýshylar tipti eń usaq turmystyq qoqystardy da jınaýǵa tyrysty. Balalar men sport alańdary retke keltirildi.
– Akııaǵa qatysýǵa oqýshylardy shaqyrdyq. Óskeleń urpaqtyń tabıǵatty baǵalaýy, onyń saqtalýyna qamqorlyq jasaýy mańyzdy. Meniń oıymsha, biz birigip, tapsyrmany óte jaqsy oryndadyq, – dep atap ótti demalys saıabaqtary men gúlzarlar basqarmasynyń basshysy Talǵat Baıtohın.
Basty maqsat – ekologııalyq mádenıetti qalyptastyrý.
– Biz jastardy tabıǵatqa jaýapkershilikpen jáne uqyptylyqpen qaraýǵa shaqyramyz. Eń aldymen, lastanýdyń aldyn alý kerek, qoqysty kez kelgen jerge tastamaý kerek. Qaladaǵy tazalyq pen jaılylyq árqaısymyzǵa baılanysty, – deıdi Jastar resýrstyq ortalyǵynyń basshysy Iakýb Djamalov.
Ekologııalyq senbilikke qosymsha retinde sýret salý sheberlik sabaǵy ótti. Jas sýretshiler óz sýretterinde tabıǵatqa degen súıispenshilikterin, qorshaǵan ortaǵa degen kózqarastaryn bildirdi. Al maskot-qatysýshylar jaǵymdy kóńil-kúı syılady.
