«Qala kúni» merekesi qarsańynda Oral qalasynda 24 aýla qoldanysqa berildi. Turǵyn úılerdiń aldyna balalar alańqaıy men ashyq sport alańdary ornatyldy.Tasqyn sýdan zardap shekkenderge turǵynjaı kiltteri tabystalyp, Zashaǵan kentinde jańa tynymbaq paıda boldy. Oblys ákimi Narıman Tóreǵalıev pen qala ákiminiń mindetin atqarýshy Jandos Dúısenǵalıev qatysty.
Úsh jylda qala aýmaǵynda 61 aýla abattandyrylǵan. Keıingi jyldary qalada «Aýlalardy keshendi abattandyrý» baǵdarlamasy aıasynda birqatar kóppáterli turǵyn úılerdiń aýlalary jańa keıipke enip jatyr. Tek sońǵy úsh jylda qala aýmaǵynda 61 aýla abattandyrylǵan. Bıyl da qala aýmaǵynda 24 aýlada tıisti jumys júrgizilip jatyr. 12 aýlada josparlanǵan jumystolyq aıaqtalǵan.
Abattandyrý jumysy júrgizilgen Abaı dańǵyly, 196/1 úıdiń aýlasy saltanatty túrde qoldanysqa berildi. Oral qalasynyń turǵyn úı-kommýnaldyq sharýashylyǵy, jolaýshy kóligi jáne avtomobıl joldary bóliminiń basshysy Abylaı Nurmaqov aýla turǵyndaryn qaýynyshpen quttyqtady. Turǵyn úı qyryq bir jyl buryn paıdalanýǵa berilgen. Munda eki júzge jýyq otbasy turady. Budan buryn kóp qabatty úıdiń shatyry jańartylyp, qasbeti syrlanyp, jertólesi jóndeýden ótken. Al ótken jyly aýlasy abattandyrylǵan. Mine, osy jumystar sátti aıatalyp, turǵyndar zor qýanyshqa keneldi. Rozalııa Imanǵalıevanyń atalmysh mekenjaıda otbasymen 1983 jyldan beri turady.
– Aýla turǵyndar men balalardyń seıil quratyn ornyna aınaldy. Turǵyndar atynan alǵys aıtamyn. Jańa úıge kóshkendeı sezinip júrmiz, – dedi Rozalııa Imanǵalıeva.
Aýlalardy abattandyrý jumysy aýmaqtyń erekshelikterine qaraı júzege asyrylýda. Atalmysh maqsatqa 1,4 mlrd teńge qarajat bólingen. Zamanaýı oıyn kesheninde balalardyń qaýipsizdigi úshin jumsaq jabyn tóselgen. Aýlaǵa Street workout jabdyqtary ornatylǵan. Fýtbol, basketbol oıyndaryna arnalǵan alań bar.
Oral qalasynyń turǵyn úı-kommýnaldyq sharýashylyǵy, jolaýshy kóligi jáne avtomobıl joldary bólimi mamandarynyń málimetinshe, barlyq 24 aýlada josparlanǵan jumys bıyl qazan aıynyń sońyna deıin aıaqtalady.
Aıta keteıik, «Aýlalardy keshendi abattandyrý» baǵdarlamasy boıynsha turǵyndar ótinim qaldyryp, aýla aýmaǵyna júrgizý qajet jumysty ózderi kórsetedi.
36 otbasy baspanaly boldy
Oralda qala kúnine oraı turǵyn úı kezeginde turǵan 36 otbasy baspanaly boldy. Sondaı-aq sý tasqynynan zardap shekken eki kópbalaly januıaǵa páter kilti tabystaldy. Jalpy Batys Qazaqstan oblysynda tasqyn zardaby tolyq joıyldy.Bul týraly aımaq basshysy Narıman Tóreǵalıev málimdedi.
Turǵyndar baspanamen túgel qamtylyp, kásipkerlerge kelgen shyǵyn ótelýde. Kóktemde óńirdiń 5 aýdanynda 1300-deı úıdi sý bassa, Oralda 14 myńdaı saıajaı ýchaskesi sý astynda qalǵan bolatyn. Óńirdegi sý tasqynyn mamandar birneshe kezeńge bóledi. Áýeli erigen qar aýla, kóshelerdi bassa, odan keıin kishigirim ózender tasıdy. Sosyn baryp bastaýyn Reseıden alatyn transshekaralyq darııalarǵa kezek keledi. Bıyl ekinshi kezeńde Bórli, Qaratóbe, Syrym, Terekti aýdandary aıtarlyqtaı zardap shekti. 1300-deı úıdi sý aldy. Al negizgi soqqyny oblys ortalyǵy qabyldady. Jaıyqtyń tasýynan ózen jaıylmasyndaǵy 14 myńsaıajaı ýchaskesi sý astynda qaldy. 55 baý-baqshaseriktestigin turaqty mekendeıtin on myńdaǵanadam bir kúnde baspanasynan aıryldy.
Esqalıevter otbasy buryn qalada páter jaldap turatyn. Otaǵasy kólik jóndese, Tursyngúl bala kútimimen úıde otyrǵan. Byltyr kóktemde saıajaı seriktestiginen jer alyp, shaǵyn úı salǵan. Bar jıǵan-tergenderin qurylysqa jumsap, jańa qonysta bir ǵana qystaǵan. Otaǵasynyń aıtýynsha qyzyl sýdy toqtatýǵa bar kúshti salǵanymen qoldan esh nárse kelmepti.
Tórt aı boıy evakopýnktti panalaǵan Esqalıevter otbasynyń páterge qol jetkizýi de ońaı bolmaǵan. Aqyry qala basshylyǵynyń qoldaýymen qaıyrymdylyq qorlary qol ushyn sozdy. Qazir 3 balaly januıa Kemeńger kóshesindegi kóp qabatty úıden 3 bólmeli páterge qol jetkizdi.
– Áli kúnge deıin joldasym men balam senbeı júr. Qasym-Jomart Kemeluly Toqaev sýǵa ketkender úısiz qalmaıdy dedi. Úkimet bergen ýádesine turdy, – dedi jańa qonys ıesi Tursyngúl Batyrǵalıeva qýanyshyn jasyra almaı.
Qazir 4 aýdanda 401 úı, oblys ortalyǵynda 375 úı paıdalanýǵa berildi. Arnaıy komıssııa sheshimimen saıajaı úıi jalǵyz baspana sanatyndaǵy 2330 oraldyq úımen qamtylýy tıis bolatyn. Búginde páterlerdi satyp alý jumystary aıaqtaldy. Qala ákiminiń orynbasary Azamat Halelovtyń málimetinshe, tasqynnan kelgen shyǵyn 70 mıllıard teńgege jýyqtaıdy.
– Bıylǵy sý tasqyny úlken sabaq boldy.Kóptegen azamattar jerdiń sanatyna qaramastan saıajaılarda úılerin saldy. Aldaǵy ýaqytta saıajaı jerleri tárkilenetin bolady. Memlekettiń menshiginde qalady. Keshendi sharalar júrgiziledi. Qazir tıisti jol kartasyn jasap jatyrmyz , – dedi Oral qalasy ákiminiń orynbasary Azamat Halelov.
Ortaq kúsh-jigerdiń arqasynda aıtyp kelmeıtin apattyń zardaby qazir tolyq joıyldy. Eń bastysy, Memleket basshysy ýáde etkendeı,eshkim de kómeksiz, baspanasyz qalǵan joq.
Zashaǵanda – jańa býlvar
Qoǵamdyq keńistikti abattandyrý – qazirgi zamanǵy qala qurylysynyń ózekti máseleleriniń biri. Osylaısha, halyqqa qolaıly jaǵdaı jasaı otyryp, jaıly ómir súrý ortasyn qurý mindetteri sheshiledi.
Ótken jyly Oral qalasynyń úsh aýdanynda demalys aımaǵynyń qurylysy bastalǵan bolatyn. №44 mekteptiń jáne M.Ótemisov atyndaǵy ýnıversıtettiń mańynda tynymbaq halyq ıgiligine berildi. Qala kúni merekesi qarsańynda Zashaǵan kentindegi Oral-Saratov tas jolynyń boıynda jańa býlvar paıdalanýǵa tapsyryldy. Saltanatty sharaǵa oblys ákimi Narıman Tóreǵalıev qatysty.
Býlvarda 3 balalar alańy, 8 strıt-vorkaýt aımaǵy, 1 sport alańy, 4 eresekterge arnalǵan aımaq, júgirý jolaǵy, átkenshekter, kishi arhıtektýralyq pishinder jáne ózge de elementter qarastyrylǵan. Aýmaq jaryqtandyrylyp, qorshaý men kanaldan ótetin birneshe kópir ornatylǵan. Býlvardyń jalpy aýmaǵy – 5,4 shaqyrym. Nysannyń qurylysyn merdiger - «ÝnıversalStroıServıs» JShS júrgizdi. Nysannyń ashylý saltanatyna oblys ákimi Narıman Tóreǵalıev qatysyp, kent turǵyndaryn jańa demalys aımaǵynyń qoldanysqa berilýimen quttyqtady.
– «Oraldyń ár aýdanynda demalys oryndaryn salýdamyz. Bul – halyqtyń taza aýada serýendeýine, tynyǵýyna qolaıly jaǵdaı jasaý úshin qabyldanǵan sharalar. Jaıyq jaǵalaýyn da keńeıtip, qaıta jańǵyrtý josparymyzda bar. Kentturǵyndaryn qýanyshtarymen quttyqtaımyn. Jańa býlvardaǵy jabdyqtardy uqypty ustap, ıgilikterińe paıdalanyńyzdar», – dedi Narıman Tóreǵalıev. Jurtshylyq jańa býlvardy aralap, dán rıza.
Káýsar BAIǴALIEVA
