Prezıdent Qasym-Jomart Toqaev barlyq deńgeıdegi máslıhattardyń ekinshi respýblıkalyq forýmy barysynda halyqqa úndeý jasady, dep habarlaıdy "Adyrna" tilshisi Aqordaǵa silteme jasap.
"Otandastarymyzǵa aıtarym: demokratııa – úzdiksiz júretin úderis. Oǵan turaqty túrde atsalysý qajet. Osyny qaperden shyǵarmaýymyz kerek. Álemdegi kez kelgen tabysty demokratııalyq qoǵam aınalasyna beı-jaı qaramaıtyn azamattardyń arqasynda ǵana damıdy, ómirsheń bolady. Ár azamattyń ál-aýqaty men Otanymyzdyń taǵdyry tek ózimizdiń qolymyzda. Balalarymyz ben nemerelerimiz bizdiń jetistikterimizdi eseleýi úshin keler urpaqqa qajetti jaǵdaı jasaý – ortaq paryzymyz", - dedi Prezıdent.
Memleket basshysy óz sózinde el bolashaǵy – jastardyń qolynda ekenin atap ótti.
"Men bul týraly únemi aıtyp júrmin. Jerimizge egilgen ár taldyń ıgiligin kóretin de – jas urpaq. Bir sózben, ne istesek te, bárin elimizdiń erteńi úshin isteımiz. Sondyqtan biz balalardyń densaýlyǵyna, olardyń bilimi men tárbıesine búkil el bolyp erekshe kóńil bólýimiz kerek. Memleket osy baǵytta naqty sharalar qabyldady, ıaǵnı qarajat bólip, qajetti ınfraqurylym salýda. Jalpy, bul jumys qarqyndy júrip jatyr deýge bolady, biraq, aldymyzda turǵan mindetter aýqymdy, áli de atqaratyn sharýa kóp".
