Batys Qazaqstan oblysyna qarasty Kaztalov aýdanynyń ortalyǵynda turǵyn úı kezegindegi azamattarǵa baspana kilti tabystaldy.
Memleket basshysy Qasym-Jomart Toqaev úı kezeginde turǵan áleýmettik osal toptaǵy azamattardyń baspana máselesin sheshý qajettigin aıta kele: «Áleýmettik osal toptaǵy azamattarǵa qoldaý kórsetý – bizdiń basty mindetimiz. Úı kezeginde turǵan azamattardyń baspana máselesin sheshý úshin memlekettik qoldaýdy kúsheıtip, turǵyn úı qurylysy men onyń qoljetimdiligin arttyrý qajet. Ásirese, kópbalaly otbasylarǵa, múgedektigi bar jandarǵa jáne halyqtyń áleýmettik osal toptaryna erekshe nazar aýdaryp, olardyń baspanaǵa qol jetkizýine barynsha jaǵdaı jasaýymyz kerek» – dep Úkimetke tapsyrma bergen bolatyn.
Prezıdenttiń tapsyrmasyna sáıkes bıyl Kaztalov aýdany boıynsha 28 eldi-mekende úı kezeginde turǵan áleýmettik osal toptaǵy otbasylarǵa arnap qos páterden 116 úıge qarjy bólinip, qoldanysqa berilýde.
BQO ákimi Narıman Tóreǵalıev baspanaǵa ıe bolǵan azamattardy quttyqtap, turǵyn úı kiltin saltanatty túrde tabys etti. Baspana ıeleri memlekettik baǵdarlamanyń aýdanda júzege asýyna yqpal etken oblys basshylyǵyna rızashylyqtaryn bildirdi.
– Búgin Prezıdentimiz Qasym-Jomart Kemelulynyń bastamasymen aýyl-aımaqtardy damytý boıynsha berilgen tapsyrmasynyń arqasynda baspanaly bolyp jatyrmyz. Osy baǵdarlamanyń júzege asyrylýyna at salysqan barsha azamattarǵa jáne jańa baspana salyp bergen merdigerge rızashylyǵymdy bildiremin. Baspana ıelerin búgingi qýanyshtarymen shyń júrekten quttyqtaımyn. Aldaǵy ótetin referendýmda elimizdiń erteńi úshin otbasymyzben óz tańdaýymyzdy jasaıtyn bolamyz. Memleketimizdiń qoldaýynyń arqasynda baspanaly bolatyn otbasylarymyz kóp bolsyn, –dedi Kaztalov aýylynyń turǵyny Araılym Sansyzbaeva.
Kásibı medıator, eńbek ardageri Marat Toıasov ta baǵdarlamanyń ıgiligi mol ekenin jetkizdi.
– Sońǵy ýaqytta aýdanymyzda turǵyn úılerdiń salynýy qýantarlyq jáıt. Prezıdentimizdiń tikeleı tapsyrmasymen oblysymyzdyń birneshe aýdandarynda jáne Oral qalasynda sanaýly kúnderdiń ishinde jańa baspanalar boı kótergenine barshamyz kýámiz. Prezıdentimizdiń bastamasymen 6-qazańda ótetin referendýmǵa jerlesterimizben belsene qatysyp, elimizde atom elektr stanııasynyń salynýy úshin tańdaý jasaımyz. Shańyraqtaryńyz shattyqqa tolyp, berekeli baspanada baqytty ǵumyr keshińizder! – dedi ol.
