Shahmattan áıelder quramasy Dúnıejúzilik shahmat Olımpıadasynda kúmis medal jeńip aldy, dep habarlaıdy “Adyrna” ulttyq portaly.
2024 jylǵy Dúnıejúzilik shahmat olımpıadasynda el quramasy kúmis medal jeńip alǵan. Prezıdent Qazaqstannyń áıelder quramasyn jelidegi paraqshasynda quttyqtady.
”Bul – qazaq shahmat mektebi men shahmatshy qyzdarymyzdyń tamasha jetistigi. Sportshylarymyz bıik belesterdi baǵyndyra bersin!” - dep jazdy memleket basshysy óziniń H áleýmettik paraqshasynda.
45-shi shahmat Olımpıadasynyń sheshýshi týrynda Qazaqstannyń áıelder quramasy AQSh komandasymen baq synasty. Býdapeshtte ótken jarysta qazaqstandyqtar 18 upaı jınap, alǵash ret Olımpıada júldegeri atanyp otyr.
Ulttyq qurama namysyn Bıbisara Asaýbaeva, Merýert Kamalıdenova, Ksenııa Balabaeva, Alýa Nurman, Amına Qaıyrbekova qorǵady.
Jarysqa barlyǵy 188 eldiń komandasy qatysqan bolatyn.
