Bıyl memlekettik grantqa ıe bolǵandar sany jyldaǵydan kóp. Jaqsy úrdis. Kóp balaly otbasylardan shyqqan talapkerlerge qosymsha taǵy 5000 grant bólindi. Qaraǵandy oblysyna osy bes myńnyń 195 granty berildi. Biraq dál qazir oblysta osy grantqa tek 67 bala ǵana ótinish jazdy. Iaǵnı bólingen granttyń basym bóligi ıgerilmeıdi. Nege dersiz. Sebebi Bilim jáne ǵylym mınıstrligi kóp balaly otbasylarǵa bólingen qosymsha grantty pedagogıkalyq, aýylsharýashylyq jáne ınjenerlik, IT mamandyqtarǵa berilsin dep buıyrǵan.
Sonda deımin, oblystyq Bilim basqarmasy óńirdiń erekshelikterine, kóp balaly otbasylardyń sanyna, UBT tapsyryp shekti ball jınaǵandar tańdaǵan mamandyqqa monıtorıng jasap, ózdiginen usynys jasaı almaı ma? Mektepter men Bilim basqarmasy túlekterdiń qandaı mamandyqqa tapsyrǵanyn biledi. Osynyń negizinde, bizdiń óńirde mynandaı mamandyqtarǵa basymdyq berildi, osynsha túlek myna mamandyqty tańdady, grantty osylarǵa bólýlerińizdi suraımyz dep nege usynys jasamaǵan? Endi bos qalǵan 128 grant qaıda beriledi? Respýblıka boıynsha kóp balaly otbasylardyń túlekterine berilgen 5000 granttyń qanshasy ıesin tapty?
Jyl basynda oblys ákimi Erlan Jaqanuly kóp balaly otbasylardyń balalary úshin kolledjderge 8000 grant beriledi dep habarlaǵan. Keshe oblystyq Bilim basqarmasyna bardym. Kolledjderge kóp balalylar úshin birde bir grant bólinbegen. Jalpy konkýrsqa túskende de esh jeńildik joq. Al, UOS men aýǵan soǵysy ardagerleriniń balalaryna grant berý kezinde jeńildik qarastyrylǵan.
Qaraǵandynyń birde bir ýnıversıteti kóp balaly otbasylardyń stýdentterine 10 paıyz da jeńildik jasamaıdy. Bir úıden eki stýdent aqyly bólimde oqysa tipti aýyr. Tamyzdyń 25 kúni oqý aqysynyń 30 paıyzyn tólemese oqýǵa qabyldamaıdy. Al ıgerilmegen grant qanshama?
Lázzat QOJAHMET
"Adyrna" ulttyq portaly
