Qazaqstannyń eks-prezıdenti Nursultan Nazarbaevtyń úlken jáne ortanshy qyzdary Darıǵa Nazarbaeva men Dınara Qulybaeva eń yqpaldy 25 qazaq áıeliniń tizimine engen joq. Reıtıngti 2024 jyldyń qyrkúıeginde Forbes Woman Kazakhstan usynǵan, dep habarlaıdy “Adyrna” ulttyq portaly.
Long-lıstke 110 adam kirdi, onyń ishinde 42 qatysýshy irikteldi. Al qysqa tizimdi sarapshylar baǵalady. Olardyń baǵalaýy boıynsha eldegi eń yqpaldy 25 áıeldiń tizimi jasaldy.
«Meniń oıymsha, reıtıngtiń kóshbasshysy Úmit Shaıahmetova (Halyq bankiniń basshysy) ekeni eshkimdi tań qaldyrmaıdy», - dep jazady Forbes Woman Kazakhstan jýrnalynyń bas dırektory Zýlfııa Haıbýllına.
Shaıahmetovadan basqa, reıtıngte qarjy sektorynan Qazaqstan Respýblıkasy Qarjy naryǵyn retteý jáne damytý agenttiginiń tóraıymy Mádına Ábilqasymova (2-oryn), «Otbasy banki» AQ basshysy Lázzat Ibragımova (5-oryn), KASE Basqarma Tóraǵasy jáne Dırektorlar keńesiniń múshesi Alına Aldambergen (11-oryn) bar.
Reıtıngke isker áıel de bar. Máselen, 18-shi oryndy Lankaster Holdıngtiń teń quryltaıshysy, elimizdegi eń iri qala – Almaty qalasynyń ákimi Erbolat Dosaevtyń jubaıy Gúlnár Dosaeva ıelendi.
Úzdik 25-ten úkimettegi áıelderdi de kóremiz. 4-orynda qazir Mádenıet jáne aqparat mınıstrligin basqaryp otyrǵan Aıda Balaevany kórýge bolady.
Sonymen qatar, tizimde Qazaqstan prezıdenti Qasym-Jomart Toqaevtyń ápkesi Qarlyǵa Izbastına da bar. Bul reıtıngte ol 17-orynda. Jýrnalıster Izbastınanyń ákesi Kemel Toqaev atyndaǵy qaıyrymdylyq qorynyń teń quryltaıshysy ekenin jazady. Ol buryn Meerbusch jáne Kazakhstan Tungsten & Molybdenum kompanııasy arqyly bıznes jasaǵan.
Darıǵa Nazarbaeva men Dınara Qulybaeva yqpaldy áıelder reıtınginde joq. Ekeýi de elimizdiń tuńǵysh prezıdenti Nursultan Nazarbaevtyń qyzy, ekeýi de Qazaqstannyń eń aýqatty adamdarynyń reıtıngine engen.
Darıǵa Nazarbaeva eń baı 75 bıznesmenniń ishinde 15-shi orynda, onyń baılyǵy 590 mıllıon dollarǵa baǵalanady. Al Dınara Qulybaeva kúıeýi Tımýr Qulybaevpen birge baılar reıtınginde ekinshi oryndy alady. Olardyń árqaısysy 5 mıllıard dollardy quraıdy.
