Qazaqstan ulttyq quramasy Astanada ótip jatqan V Dúnıejúzilik kóshpendiler oıyndarynyń ekinshi jarys kúnin 14 altyn, 3 kúmis, 8 qola medalmen aıaqtady, dep habarlaıdy «Adyrna» tilshisi.
Atap aıtsaq, Jaqsylyq Úshkempirov atyndaǵy jekpe-jek saraıynda ótken qazaq kúresinen fınaldyq kezeńde qazaqstandyq segiz balýan kúresip, bári de altyn medal enshiledi.
Jamby atý sportynyń Azııa stılinen júldeli úsh oryndy da qazaqstandyq sportshylar jeńip aldy. Jarys nátıjesi boıynsha Batyr Beksaýyt altyn júldege ıe boldy. Kúmis medaldi Aıtbek Sarybaı enshilese, qola júldeni Eralhan Aıkóz ıelendi.
Qazaqstandyq sportshylar aýdaryspaqtan úsh salmaq dárejesinde de altyn medal aldy. 60 kelide Ermek Quralbaı, 70 kelide Almat Látipbek, 80 kelide Daryn Ótkelbaı jeńimpaz atandy.
Al sadaqshylarymyz «Pýta» nysanasynda 3 medaldy qanjyǵalaryna baılady.Aıkórkem Batıhan men Qasymhan Qanat qola medal ıelense, Jánibek Qulmyrzaev altyn medal aldy.
Kýrashtan qazaqstandyq 6 sportshy júldege ıe boldy. 87 keli salmaqta Albına Bahıeva altyn júlde alsa, 79 keli salmaqta Ajar Salyqova men +100 kelide Marat Baıkamýrov kúmis júldeni enshiledi. 81 keli salmaqta Erzat Arǵynov, 81 keli salmaqta Bekádil Shaımerdenov pen 87 keli salmaqta Ulbolsyn Adılova qola júlde aldy.
Saha halqynyń ulttyq sporty mas-restlıngten erler arasynda 65 keli salmaqta Birimjan Asylmurat pen áıelder arasynda 55 keli salmaqta Tahmına Qojamberdıeva qolda júlde ıelendi.
«Qazanat» ıppodromynda ótken kókpardan irikteý kezeńinde Qazaqstan quramasy Ózbekstandy 16-0 esebimen jeńdi. Al kókbóriden ulttyq qurama sportshylary AQSh komandasymen kezdesip, 18-0 esebimen alǵa shyqty.
Aıta keteıik, 13 qyrkúıekke deıin jalǵasatyn V Dúnıejúzilik kóshpendiler oıyndaryna álemniń 89 elinen 2430 sportshy qatysyp jatyr. Baıraqty básekede Qazaqstan namysyn 261 sportshy qorǵaıdy. Kóshpendiler oıyndarynda 21 sport túri boıynsha 97 medal jıyntyǵy sarapqa salynady.
