Búgin, 3 qyrkúıekte “Qaırat” fýtbol klýbynyń bapkeri Aleksandr Kerjakov qyzmetinen ketti, dep habarlaıdy “Adyrna” ulttyq portaly.
Almatylyq klýbtan resmı túrde ketken bapker kelisimsharttyń buzylǵanyn aıtty.
“Men keshe tańerteń qyzmetten ketýge ótinish berdim. Bul sheshimdi qabyldaý men úshin ońaı bolǵan joq, sebebi men osynda jumys isteýdi jalǵastyrǵym keldi. Biz oıyn turǵysynan óte mańyzdy progresske qol jetkizdik, jaqsy nátıjeler kórsettik. "Qaırat" araǵa uzaq ýaqyt salyp alǵash ret týrnır kestesinde kósh bastady jáne chempıon bolýǵa múmkindigi bar. Biraq men bas bapker jumysta jol berýge bolmaıdy dep sanaıtyn jaǵdaılar bar. Tolyǵyraq aıtpaı-aq qoıaıyn, ol klýbtyń ishinde qalsyn. Komandaǵa jáne jigitterge sáttilik pen jeńis tileımin", - dedi Kerjakov.
Kerjakovtyń jetekshiligimen ótken sońǵy oıynda "Qaırat” klýby óz alańynda "Astana" FK-dan 1:0 esebimen jeńilgen bolatyn.
