Bolat aǧa ömırden öttı... Fototılşı Bolat. Şeber Bolat. Maitalman Bolat. Baldaǧy altyn qūryş Bolat.
Altyn baldaǧy – qiyrdaǧyny şalatyn, közdegenın qalt jıbermeitın, töbesınen qūs ūşyrmaityn, baǧa jetpes fotoaaparaty. Qūryş degenımız – suret tüsıru önerınıŋ şyŋyna şyqqan Bolat aǧanyŋ sipattamasy.
Öz käsıbınıŋ qyr-syryn jetık igerıp, şyn şeber atanu üşın eldıŋ ziialylary şoǧyrlanǧan ortalyq qalalardyŋ bırınde tūru şart emes. Sondai-aq jalpaq jūrtty eleŋ etkızetın erekşe suret tüsıru üşın fotomyltyǧyŋnyŋ tūmsyǧy tört qarys, qūny jaiynbas kölık satyp aluǧa jetetındei tym qymbat boluy da mındettı emes. Ol bıreude bar, bıreude joq qarapaiym fotoapparatymen-aq ǧalamat portretter men ǧajaiyp peizajdardy, ädemı körınıster men äserlı etiudterdı baspasöz tarihynda qaldyrdy. Syr boiyndaǧy köne qalanyŋ arǧy basy men bergı basynda tynymsyz şapqylap, sol öŋırdıŋ ataqty audandary men alys auyldaryn armansyz aralap jürıp-aq, Almaty men Astana jaqtan anda-sanda şaŋ berıp qalatyn äigılı adamdardy nysanaǧa alyp, tanymal tūlǧalar galereiasyn jasady.
Onyŋ är kadry qūndy boldy. Özgeler suret tüsırdı. Ol siujet tüsırdı. Özgeler portret tüsırdı. Ol portrettık ocherk tüsırdı. Özgeler şopannyŋ suretın tüsırdı. Ol şopan turaly şyǧarma tüsırdı. Sonyŋ bärın bır-aq kadrǧa syiǧyzdy. Onyŋ şyrt etkızgenı şedevr bop şyǧady. Ol qazaq fotoönerıne körkemdık äkeldı. Äsemdık pen ädemılık darytty. Sen de, men de, ol da tüsıre alatyn jansyz suretke belletristikanyŋ jügın arqalatty. Mıne, baldaǧy altyn qūryş Bolattyŋ baldaǧy bölek basqalardan aiyrmaşylyǧy da osynda.
Onyŋ keiıpkerlerı söilep tūrady. Şetınen mınezdı. Şetınen şejırelı. Şetınen qiqar. Şetınen şeşen. Sebebı, surettıŋ keiıpkerlerı surettıŋ avtoryna qatty ūqsaidy.
Men Bolat aǧa Omarälievtıŋ bıraz suretın arqau etıp, bırqatar maqala jazdym. Oiǧa alǧan bıraz josparlarymyz barşylyq edı. Ömırdıŋ özı keide osylai jospar-jobaŋa baǧynbai ketedı eken ǧoi.
Köbıne-köp kino men televiziia älemıne tesılı «stop-kadr» degen ūǧym bar. Eŋ sättı nemese eŋ qajettı bır kadrdy taŋdap alyp, osynyŋ töŋıregınde oi tolǧaisyŋ. Nemese sonyŋ ainalasynan mäsele tuyndatasyŋ. Osy «stop-kadr» ūǧymy äigılı fototılşı Bolat Omarälievtıŋ de şyǧarmaşylyq tabiǧatyn tap basatyn. Qarauylǧa alǧanyn mült jıbermeitın ol Seidahmet Berdıqūlov aǧamyz aitqandai, jūmyr jerdı kındıgınen ūstap, solqyldatyp tartyp tūryp, tulap jatqan tırşılıktı lezde toqtatyp tastai alatyn. Eŋ ädemı, eŋ äserlı degen mezettı aŋdyp tūryp, qas-qaǧym sätte qaǧyp tüsıretın. Jūrttyŋ közıne ılıne bermeitın qaltarystaǧy oljany alystan aŋǧaryp, jan balasyna bıldırmei qaqşyp ala qoiatyn.
Osyndai teŋdessız şeber bolǧanyna qaramastan Bolat aǧanyŋ soŋynan şäkırt ermedı. Eretındei de mümkındık tumady. Ol üşın keiıngı balalar Bolat aǧanyŋ özı sekıldı qysta qar keşıp, jazda jantaq jastanyp, jaŋbyrǧa juynyp jüre beretın jankeştı boluy qajet edı. Sondyqtan ol ünemı Syr boiyndaǧy qalyŋ qamys arasynda qalyp qoiǧan sol baiaǧy jotaly jolbarys qūsap jalǧyz jortty. Jalǧyz jürıp-aq jarty älemge tanyldy.
Mıne, endı Bolat aǧamyzdyŋ soŋǧy saǧaty soqty... Talaidy tamsandyrǧan «stop-kadr» osylai toqtady. Ädette «stop-kadr» paidalanylyp bolǧan soŋ jybyr-jybyr etıp, qaita jalǧasatyn. Qozǧalysyn kılt tejep, bırden sıresıp qatyp qalǧan beinege qaiyra jan bıtetın. Al būl «stop-kadrdyŋ» toqtaǧany toqtaǧan endı... Maestro mäŋgılık mekenıne ketıp barady... Baqūl bolyŋyz, aǧa!
Ūqsas jaŋalyqtar
