Jambyl oblysyndaǵy 19 myńǵa jýyq sharýa qojalyqtyń tórtten birin názik jandylar basqaryp otyr. Bul týraly oblys ákiminiń orynbasary Murathan Shúkeev aýyl áıelderi forýmynda málimdedi.
Forým áıelder isteri jáne otbasylyq-demografııalyq saıasat jónindegi Qazaqstan Respýblıkasy Prezıdentiniń janyndaǵy ulttyq komıssııanyń qoldaýymen ótti. Murathan Júnisáliulynyń aıtýynsha, oblysta áıelderge zor qoldaý jasalyp jatyr.
– Máselen, aýdandyq máslıhat depýtattarynyń 29-y – áıel, 20415-i – ustaz, 785-i – dáriger, 1000 myńǵa jýyǵy – memlekettik qyzmetkerler. Sondaı-aq, oblystaǵy 19 myńǵa jýyq sharýa qojalyqtyń tórtten birin názik jandylar basqaryp otyr. Aǵymdaǵy jyly 393 áıel «Bastaý-Bıznes» jobasymen kásip ashýdyń qyr-syryn oqyp-úırense, memlekettik baǵdarlama boıynsha 111 áıel shaǵyn nesıe, 46 áıel qaıtarymsyz grant aldy. Al «Eńbek» baǵdarlamasy aıasynda jumyspen qamtýdyń belsendi sharalaryna qatysqan názik jandylardyń sany 9725-i qurady. Búginde qaı salada bolmasyn názik jandylardyń alatyn orny erekshe – dedi oblys ákiminiń orynbasary.
Jıynda Májilis depýtaty Maıra Aısına sóz alyp, óz oıyn ortaǵa saldy. Depýtattyń aıtýynsha, áıelder elimizdiń damýy úshin barlyq salada belsendi eńbek etip jatyr.
– Elimizdegi azamattardyń 51 paıyzy, al «Nur Otan» partııasynyń 56 paıyzy áıelder bolyp sanalady. Búginde qaı salany almasańyzda onda áıelder qaýymy belsendi eńbek etýde. Osydan 15 jyl buryn Parlament Májilisinde 8 áıel bolsa, qazirgi tańda 29 áıel ónimdi eńbek etýde. Bul Parlament músheleriniń 28 paıyzyn quraıdy. Bir qyzyǵy damyǵan memleketterdiń ózinde áıelderdiń úlesi salmaǵy 13-aq paıyz. Sondaı-aq bilim men densaýlyq saqtaý salasynda eńbek etetin azamattardyń 90 paıyzy áıelder bolyp otyr. Ekonomkaǵa kelsek, elimizdiń jalpy ishki óniminiń 3/1 bóligin áıelder beredi eken. Sebebi, shaǵyn jáne orta kásipkerlikte 30 paıyz áıelder jumys isteıdi. Al jeke kásipkerlikti alatyn bolsaq, onda 60 paıyz áıelder quraıdy. Dúnıejúziniń sarapshylary 2030 jylǵa deıin ekonomıkanyń shyǵysy men kirisin 90 paıyz áıelder baqylaıtynyn aıtady, – deıdi depýtat.
Maıra Arapqyzynyń aıtýynsha, Aýyl áıelderiniń turmys deńgeıin kóterip, sońǵy shyqqan tehnologııalardy jetkizýge jetkizýimiz kerek. Sondaı-aq ol elimizde kásipkerlikti damytý úshin jeńildetilgen nesıe berý jaqsy jolǵa qoıylǵanyn eskertti.
Sondaı-aq jıynda senat depýtaty, QR Prezıdenti janyndaǵy Áıelder isteri jáne otbasylyq-demografııalyq saıasat jónindegi ulttyq komıssııa tóraıymynyń orynbasary Lázzat Súleımen sóz sóılep, óz oıyn ortaǵa saldy. Budan keıin «Jasyl ekonomıka jáne G-Global-dy damytý Koalıııasy» ZTB Basqarma Tóraǵasy Saltanat Raqymbekova sóz alyp, názik jandylardyń qoǵamdaǵy róli, otbasy jáne demografııalyq saıasat jóninde óz oılaryn ortaǵa salyp, pikir bildirdi.
