Prezıdent Qasym-Jomart Toqaev Tájikstan premer-mınıstri Kohır Rasýlzodamen kezdesti. Bul týraly búgin, 23 tamyzda Aqordanyń baspasóz qyzmeti jazdy, dep habarlaıdy «Adyrna» tilshisi.
Áńgimelesý barysynda prezıdent qol jetkizilgen ýaǵdalastyqtar eki eldiń sanqyrly yqpaldastyǵyn jańa deńgeıge shyǵaratynyna senim bildirdi.
– Keshe jan-jaqty jáne mazmundy kelissóz júrgizildi. Onyń nátıjesi de kóńilden shyǵady. Bıznes-forýmdy joǵary deńgeıde ótkizýge qoldaý kórsetkenińiz úshin rızashylyǵymdy bildiremin. Jalpy quny 1 mıllard dollardan asatyn kelisimderge qol qoıyldy. Bul – qýantarlyq jaıt. Biz keshe ózara saýda-sattyq kólemin 2 mıllıard dollarǵa jetkizý úshin birlesip jumys isteýge kelistik. Eki el úkimetti memleketterimiz arasyndaǵy saýda aınalymyn ulǵaıtýǵa yqpal etetin túrli baǵytty qarastyrýy kerek dep oılaımyn, – dedi Qasym-Jomart Kemeluly.
Memleket basshysy elimiz Tájikstanmen syndarly seriktestikti odan ári nyǵaıtýǵa beıildi ekenin taǵy bir márte rastady.
Óz kezeginde Kohır Rasýlzoda Tájikstanǵa memlekettik saparmen kelgeni úshin Qasym-Jomart Toqaevqa alǵys aıtyp, keıingi jyldary eki el arasyndaǵy yntymaqtastyq jandana túskenine toqtaldy.
– Tájikstan úkimeti Qazaqstanmen yqpaldastyqty tereńdetýge basymdyq beredi. Sizdiń elińiz biz úshin mańyzdy saýda seriktes. Ondaǵan jyldar boıy Qazaqstan syrtqy saýda aınalymy boıynsha turaqty túrde negizgi ról atqaryp keledi. Bıylǵy birinshi jartyjyldyqta taýar aınalymy ulǵaıdy. Ósim kórsetkishi 20 paıyzǵa jýyqtady. Siz eki el úkimetterine ózara saýda-sattyq kólemin 2 mıllıard dollarǵa deıin jetkizýdi tapsyrdyńyz. Bul – oryndaýǵa bolatyn mindet, – dedi Tájikstan premer-mınıstri.
Qasym-Jomart Toqaev pen Kohır Rasýlzoda kelisilgen ýaǵdalastyqtardy júzege asyrýdyń, sondaı-aq óndiristik kooperaııadaǵy jáne saýda-ekonomıka, kólik-tranzıt salalaryndaǵy áleýetti tolyqtaı paıdalanýdyń mańyzdy ekenin atap ótti.
