Kórshi Qyrǵyzstanda qazirgi prezıdent pen burynǵy prezıdent arasyndaǵy talas atys-shabysqa ulasyp ketti: Atambaevty tutqyndaý jónindegi arnaıy operaııa bastaldy. Tikeleı efırge qarasaq, qan tógilip jatqan syńaıly!
Alataýdyń ar jaǵyndaǵy eki qoshqardyń basy bir qazanǵa syımaı jatqanynyń sebepteri belgili. Toqsan aýyz sebeptiń tobyqtaı túıini – osy soǵystyń negizinde bılik pen baılyq jatyr. Kez kelgen júıede osy eki qundylyq bir-birimen astarlasyp jatatyny belgili. Moıyndaý kerek, demokratııalyq degen elderge de bul jat qubylys emes.
Osy oqıǵanyń órbýine qarap, kóz aldyma Qazaqstandy elestetemin.
Búginde bılikke talasqan klandar arasyndaǵy tepe-teńdiktiń formaldy kepili bolyp otyrǵan Nazarbaev ómirden ótse, bizdegi jaǵdaı qandaı bolmaq?
Buryn da aıtyp júrmin, qazir de qaıtalaıyn: bizde bir-birine juldyzy qarsy, bir-birin atarǵa oq taba almaı otyrǵan, bes qarýy saı, ıaǵnı bılikke qol jetkizýge qajet barlyq ınfraqurylymy (kapıtal, menshik, múlik, bıznes, bank, BAQ, qoǵamdyq qurylymdar jáne adamı resýrs) bes-alty klan bar. Árqaısysy – «sen tur, men ataıyn»!
Erteńgi kúni, jeme-jemge kelgende sol «ataıyn» degenderi naqty iske, atysqa ulasyp ketýi ábden múmkin! Taq talasy jolynda azýyn Aıǵa bilegen olar, qajet bolsa, demokratııalyq urandardy kóterip, saıası kúrestiń barlyq múmkindikterine qarýly qarsylastyq sekildi ádis-tásildi qosýy yqtımal!
Ol úshin ne isteý kerek?
Eki ǵana jol bar.
Birinshiden, Qyrǵyzstanda qolǵa alynǵandaı (Ýkraına da sol jolǵa túseıin dep jatyr) prezıdent, basqa da laýazymdy tulǵalardyń ımmýnıtetin joıý kerek. Sonda ǵana olar halyq pen tarıh aldyndaǵy jaýapkershilikti umytpaıdy, aqyryn júrip, anyq basady. Erteńgi kúni jaýapqa tartylatyndaı qylmysqa barmaıdy.
Ekinshiden, bir prezıdent ózine deıingi prezıdentten óshin alyp, jeke bas kegin qaıtarmaýy úshin bizge tulǵalyq emes, ujymdyq túrdegi kepildik kerek. Onyń aty – kóppartııaly ári atqarýshy bılikke (prezıdentke de!) táýeldi bolmaıtyn Parlament! Atys-shabys emes, aıtys-tartys sol parlamenttiń ishinde jurip jatsyn.
Sonda ǵana endi ǵana bastalyp jatqan tranzıt kezinde elimizdiń Táýelsizdigi men tutastyǵyn saqtap qala alamyz!
Ámirjan QOSANOV
"Adyrna" ulttyq portaly
