BAIYT QABANULY: AQYNǴA ÁIEL BOLÝDYŃ MAShAQATY

1401
Qıylǵan tilek kelgen soń kóńilderin qaıtara almaı joǵarǵy mektep stýdentterimen kezdesý jasap biraz áńgime aıtyp, mahabbattyq óleńder oqydym. Kóńilderinde esh kirshik joq jastar qaıdaǵy birdemeni bilgileri keledi. Oıyńa kelmeıtin suraýlar qoıady. Búgingi jastar da solaı boldy, neshe túrli saýaldar qoıdy. Óz shamamsha jaýap qaıtaryp ortasynda qaljyńdap ta otyrdym. Sóıtip otyrǵanda zal toly stýdentterdiń orta tusynan uzyn boıly bir sulý qyz turyp sál kúlimsirep aldy da:
- Aǵa, áıelińizge arnap osynshama ádemi, kóp óleń jazypsyz, sizdiń jaryńyz netken baqytty. Aıtyńyzshy, men qaıtsem siz syqyldy bilimi zor, daryny asqaq, ataqty aqynǵa kelinshek bolamyn – dedi túıeden túskendeı ǵyp. Myrs etip kúlip jiberdim. Ne deýge bolar.
- Aınalaıyn qaryndasym - dedim, Buryn osy sen syqyldy bir qyz bir ataqty genaraldyń kempirinen:
- Apa qaıtsem siz syqyldy genaraldyń áıeli bolam - dep suraǵan eken, sonda álgi kempir esh oılanbastan:
- Qyzym ol úshin sen eń aldymen jáı bir áskerdiń kelinshegi bolýyń kerek. Sosyn kishi bastyqtyń qushaǵyna ótip, sosyn ofıserdiń qoıynyna kiresiń. Onan keıin ortasha jáne úlken ofıserdiń áıeli bolyp sońynda elýden asyp alpysqa taıaǵanda arman bolǵan genaraldyń jary bolasyń – degen eken. Sol sekildi sen men syqyldy aqynǵa áıel bolamyn deseń eń aldymen araqshyǵa jar bolýyń kerek.
Ol senimen úılengen kúnnen bastap: «Sulý ádemi kelinshek aldym» - dep iship, «Saǵan arnap jaqsy óleń jazdym» - dep ishedi. Soǵym alǵaly jınaǵan aqshańa kitáp bastyryp, sol kitábin jýyp araq ishedi...
Óziń teńdes basqa adamdardyń áıelderi torǵyn-torqanyń asylyn kıip, kez kezdiń modasynyń bárin ıyǵyna jaýyp sándenip júrgende sen tórkinińnen kıip barǵan eski kıimińe qanaǵat qyp, ashqursaqtaý kún keshesiń. Basqa adamdardyń óziń sekildi áıelderi bıge ketip, barǵa baryp saıran salyp júrgende sen kúıeýińniń dostary bolǵan qyzýlaý aqyndarǵa dastarhan jasap, araq tasyp asty-ústine túsip kútip júresiń. Taǵy sol sekildi ol seniń qushaǵyńda kele jatyp kez kelgen bir sulý qyzǵa aılanyp qarap, taǵy soǵan arnap óleń jazyp, onysy án bolyp kúndiz túni shyrqalyp seniń qulaǵyńa únemi yzyńdaıdy da turady. Taǵy, taǵy....
Mine osylardyń bárin basyńnan ótkizip, shydap baqsań elýden asyp alypysqa taqaǵan shaǵyńda dál men syqyldy bilimdi, daryndy, ataqty aqynnyń áıeli bolasyń. Solaı qaryndasym – dep betine qaradym. Ol eshteme demesten ornyna qaıta otyrdy. Shamasy aqynǵa áıel bolý onsha tileıtin tilek emes ekenine kózi jetip, kóńili sýydy-aý deımin.

 

2015.04.04
"QYSQA ÁŃGIMELER" jınaǵynan, BAIYT QABANULY

"Adyrna" ulttyq portaly

Pikirler