Qazaqstan astanasy Qańtar oqıǵasynan keıin burynǵy ataýyna oralsa da, Astanadaǵy birqatar memlekettik mekemeler óz mekenderin áli de "Nur-Sultan qalasy" dep kórsetip keledi. Bul týraly QazTAG jarııalady, dep “Adyrna” ulttyq portaly.
Málimet boıynsha, memlekettik satyp alýlar portalynda «Astana sý arnasy» memlekettik kásiporny «Nur-Sultan» ataýyn saqtaı otyryp, memlekettik satyp alý konkýrstary týraly habarlandyrýlardy áli de jarııalaıdy.
Memlekettik kásiporynnyń portaldaǵy paraqshasynda atalǵan mekemeniń tolyq ataýy «Nur-Sultan qalasy ákimdiginiń «Astana sý arnasy» sharýashylyq júrgizý quqyǵyndaǵy memlekettik kommýnaldyq kásiporny» dep kórsetilgen.
Sondaı-aq, "Nur-Sultan qalasy ákimdiginiń «№50 «Juldyz» bóbekjaı-baqshasy» memlekettik qazynalyq kásiporny", "Nur-Sultan qalasy «№ 2 óner mektebi» memlekettik qazynalyq kásiporny" degen ataýlar kezdesedi. «Elordalyq ırk» memlekettik kommýnaldyq qazynalyq kásiporny da"Nur-Sultan" qalasynyń ákimdigi men basqa da memlekettik organdarda tirkelgen.
Eske salaıyq, 2022 jyldyń 2 qyrkúıeginde Májilis depýtattary Qańtar oqıǵasynan keıin keıin úsh jyl boıy «Nur-Sultan» atalyp kelgen Astana ataýyn elordaǵa qaıtarýdy usynǵan bolatyn.
Sol kezde Memleket basshysynyń baspasóz hatshysy qyzmetin atqarǵan Rýslan Jeldibaı "Nur-Sultannyń" atyn "Astana "dep ózgertý bastamasyna túsinikteme bere otyryp, eks-prezıdent Nursultan Nazarbaevtyń qurmetine basqa da esimder berilgenin aıtty. Sol jyly 15 qyrkúıek máslıhat qabyrǵasynda atyn ózgertý máselesin qoǵamdyq talqylaý ótip, qoǵam belsendileri elordanyń burynǵy ataýy – Astanaǵa qaıtarylýyn qoldady.
2022 jyldyń 16 qyrkúıekinde parlament "Astana" ataýyn elordaǵa qaıtarý týraly túzetýlerdi maquldady. 17 qyrkúıekte Toqaev arnaıy jarlyǵymen "Astananyń" atyn elordaǵa qaıtardy.
