Májilis depýtaty Rınat Zaıytov ata-analar men muǵalimderden mektepterde zańsyz aqsha jınaý faktisi boıynsha túrli shaǵym túsip jatqanyn aıtty, dep habarlaıdy «Adyrna» tilshisi.
«Qurmetti qazaqstandyqtar, qadirli ata-analar! Bizdiń áleýmettik-mádenı damý komıtetine, depýtattardyń atyna kútpegen hattar túsip jatyr. Elimizdiń túkpir-túkpirinde mekteptegi jóndeý jumystaryna aqsha jınaý, keıbir jerlerde muǵalimderden, ata-analardan talap etken faktiler bar degen shaǵym túsýde. Osy máseleni Oqý-aǵartý mınıstrliginiń ókilimen talqyladyq. Bul máseleni bir emes, birneshe ret qaıtalanbaý úshin juma kúnge deıin men ǵana emes, áleýmettik-mádenı damý komıtetiniń depýtattaryna «eOtinish» arqyly hat jaza alasyzdar. Dáýlet Muqaev, Nartaı Aralbaıuly, Tańsáýle Serikov jáne basqa depýtattardyń atyna hat joldaýlaryńyzǵa múmkindik bar. Bastysy, qaı mektep, qashan bolǵanyn naqty kórsetińizder. Máseleni birigip shesheıik»,—dedi ol.
Aıta keteıik, buǵan deıin Oqý-aǵartý mınıstri Ǵanı Beısembaev mektepterde túrli sebeppen qarajat jınaý máselesi týraly pikir bildirgen edi.
«Eń aldymen, kez kelgen azamat aqsha jınaý faktisi týraly koll-ortalyqqa habarlaı alady. Ekinshiden, buıryqqa baǵynbaı, burynǵy «dástúrdi» jalǵastyrǵan mektep basshylyǵyna shara qoldanylady. Iaǵnı, 10 AEK mólsherinde aıyppul tóleý qarastyrylyp otyr»,—dedi mınıstr.
<
