Kókshetaý qalasynda «Alash Arystary» saıabaǵynyń bazasynda kúndizgi jazǵy «Dana bala» týrıstik etnolagerinde birinshi aýysym bastaldy. Lager jumysyn qalalyq ákimdiktiń qoldaýymen bilim bólimi, «Áýlet» mektepten tys jumys ortalyǵy uıymdastyryp otyr.
Lager ár túrli demalys baǵyttary boıynsha 6 aýysymǵa eseptelgen: «Dana bala» týrıstik etnolageri (2 aýysym), «Arlan» áskerı-patrıottyq lageri (2 aýysym), «Karate shıto-rıý» sporttyq lageri (2 aýysym).
Uıymdastyrýshylardyń aıtýynsha, saıabaq aýmaǵynda 4 ulttyq kıiz úı ornalasqan. Jazǵy demalys balalardyń belsendi demalysy, Qazaqstan tarıhy, kórnekti qazaqstandyq tulǵalar týraly bilimderin keńeıtý, qazaq halqynyń mádenıetin, tilin, dástúrleri men ádet-ǵuryptaryn zerdeleý, balalardy sportqa baýlý, balalardyń tabıǵı jaǵdaıda ómir súrý daǵdylaryn alý, balalardy patrıottyq tárbıeleý, adamgershilik jáne eriktik qasıetterdi tárbıeleý úshin uıymdastyrylǵan.
«Dana bala» týrıstik etnolagerinde baǵdarlamaǵa sáıkes aǵash óńdeý, bylǵary óńdeý, metaldan oıý, ulttyq aspap dombyra shertý, júndi ıirý jáne kıiz basý boıynsha sheberlik synyptary ótedi.
Balalar úshin «Qulager» atshabarynda kóshpeli ekskýrsııa ótedi, onda olarǵa ulttyq sport túrleri kórsetiledi: sadaq atý, kókpar, báıge.
Sonymen birge, aýysym barysynda balalarmen asyq atý, bes asyq, toǵyzqumalaq, arqan tartý sııaqty ulttyq oıyndar ótkiziledi. «Áýlet» mektepten tys jumys ortalyǵynyń pedagogtary týrıstik turmys, joryq marshrýtyn jasaý, týrıstik toraptar, ot jaǵý túrleri men tásilderi boıynsha oqytý júrgizedi, kartamen, kompaspen jumys isteýdi úıretedi.
