Memleket basshysy Qasym-Jomart Toqaev Kongo Respýblıkasy Prezıdentiniń strategııalyq máseleler jáne halyqaralyq yntymaqtastyq jónindegi jeke ókili Fransýaza Jolıdi qabyldady. Bul týraly Aqorda málimdedi, dep habarlaıdy “Adyrna” ulttyq portaly.
Prezıdent Qasym-Jomart Toqaev Fransýaza Jolıge iltıpat bildire otyryp, onyń bul sapary Qazaqstan men Kongo Respýblıkasy arasyndaǵy ózara tıimdi baılanystardy damytýǵa degen shynaıy nıettiń belgisi sanalatynyn atap ótti.
Memleket basshysy bıyl elderimiz dıplomatııalyq qatynastardyń 25 jyldyǵyn atap ótetinine toqtalyp, Kongo Respýblıkasymen yqpaldastyqty nyǵaıtýǵa daıyn ekenin aıtty.
Fransýaza Jolı qurmet kórsetkeni úshin Qasym-Jomart Toqaevqa alǵys bildirip, Prezıdent Denı Sassý-Ngessonyń izgi tilegin jetkizdi.
Kezdesýde Kongo Respýblıkasy Prezıdentiniń Qazaqstanǵa jasaıtyn aldaǵy saparyna qatysty máseleler, sondaı-aq ekijaqty yntymaqtastyqtyń perspektıvti baǵyttary talqylandy.
