"Tobyl" komandasy Eýropa lıgasy jarysynan shyǵyp qaldy. Qostanaı oblysynyń ákimi Arhımed Muhambetov "Tobyl" fýtbol klýbynyń eń basty jankúıeriniń biri. Fýtbol dese ishken asyn jerge qoıatyn bapker qostanaılyq komandany órge súıregisi kelip edi, bolmady. Kezinde ol basqarǵan Aqtóbe oblysynyń komandasy da Eýropa lıgasynda jeńilip qalyp, opyq jegen. Bir qyzyǵy oblys basshysy bir qatelikte eki márte jasap otyr. Ol qalaı?
"Aqtóbe" fýtbol klýby Estonııanyń ortańqol ujymy "Nymme Kalıý" komandasynan jeńilip Eýropa lıgasynan shyǵyp qalǵan kezde Arhımed Muhambetov bas bapker Vladımır Gazzaevty qyzmetinen alyp tastady. Sebebi, jergilikti jankúıerler komandanyń bul masqara jeńilisine qatty syn aıtty. Keıinnen Qostanaı oblysy ákimi qyzmetine taǵaıyndalǵan Arhımed Muhambetov "Tobyl" komandasyna qomaqty qarjy bólip, fýtbol klýbyna keremet jaǵdaılar jasady. Qys aılarynda fýtbol oınaýǵa múmkindik beretin fýtbol manejiniń de paıda bolýy tikeleı osy kisiniń bastamasy arqyly júzege asty. Sosyn "Tobyl" fýtbol klýbyna bas bapker qyzmetine oblys basshysynyń nusqaýymen Vladımır Gazzaev taǵaıyndaldy.
Endi minekeı, birneshe jyl burynǵy qatelik qaıtalanyp, "Tobyl" komandasy reseılik mamannyń jattyqtyrýymen Eýrop lıgasynyń alǵashqy aınalymynan shyǵyp qaldy. Myqty qarsylasqa tap bolyp, sátsizdiktiń kesirinen jeńilse maqul der edik. Biraq, olaı emes. Lıýksembýrg eliniń komandasy "Jenneske" jeńilip qalǵan "Tobyl" uıatqa qaldy.
Bul matchtyń "Astana Arenada" ótýiniń de ózindik sebebi bar. El fýtbolyna qutty stadıonǵa aınalǵan bul keshende qazir Qazaqstannyń barlyq komandasy oıyn ótkizgisi keledi. Sebebi, Eýropalyq komandalar mundaı jasandy alańda ózderiniń bar sheberlikterin kórsete almaıdy. Sondyqtan da, "Astana Arenada" fýtbol oınaý úshin Qostanaı qalasynyń áýejaıy jóndeý jumystaryn ótkizip, sol sebepten fýtbol komandasy óz alańyndaǵy matchtaryn Nur-Sultan qalasynda ótkizetin bolyp sheshildi. Bul jaǵdaıdyń barlyǵyn uıymdastyrýǵa septigin tıgizgen árıne - oblys basshysy. Alaıda, fýtbolshylar, ásirese bapkerlik shtab laýazymdy tulǵanyń bar eńbegin zaıa ketirdi.
Oıyn teń aıaqtalyp, "Jennes" komandasy kelesi kezeńge ótisimen biz bul ujymnyń bas bapkeri Nıkolıa Haısmanǵa eki saýal joldap úlgerdik.
- Sizdiń komandańyzdyń bir jyldyq bıýdjeti qandaı?
- Bizdiń bıýdjetimiz "Tobyldan" 6 ese kem dep oılaımyn. Sebebi bizdiń jyldyq bıýdjetimiz 500 myń eýro.
- Komandańyzdaǵy oıynshylar fýtboldan ózge de mamandyqtardyń ıesi shyǵar. Olar basqa jumys isteı me?
- Iá, onyńyzben kelisemin. Bizdiń komanda osydan 13 kún buryn jınalyp jattyǵý jumystaryn bastady. Olardyń kóbisi kúndiz óz jumystarynda júredi de, keshke jattyǵýǵa keledi. Sondyqtan da bizde "Tobylǵa" qarsy daıyndalýǵy kóp múmkindik bolmady.
Ermuhamed Máýlen
inbusiness.kz
