Fonogrammanyń qazaq ónerine əkeletin qasireti týraly məseleni alǵash ret 2006 jyly kóterdim. Ol kezde qazaq fonogramma aferasy týraly bilmeıtin. Sol kezde kóp el meni jazǵyratyn, ishinde "kóre almaısyńdar" degen sııaqty nebir keń taraǵan qazaqy renishter de ketip qalatyn. Keıin maǵan renjigishter əlgi fanerıkterge menen beter ósh boldy.
Óıtkeni fanerıkterdiń ónerdi aramdaǵany jaıynda, ənshilikti qorlaǵany jaıynda tynymsyz aıta berdim, jaza berdim. Bul masqara jaıynda gazet betterinde dabyl qaqtym, radıodan attandadym, telestýdııalarda jaǵa jyrtystym, syrahanalarda ózeýredim, jaǵalaýda kúnge qyzdyrynyp jatyp "aǵartýshylyq" jumystaryn júrgizdim, sulýlarmen syrlasyp otyryp, qulaǵyna quıdym, taksıde kele jatyp fanerıkterdiń alaıaqtyǵy jaıynda nebir sumdyqtar aıttym. (Óıtkeni taksıst beısharalar ylǵı fanershıkterdi tyńdaıdy eken) Úıime kisi shaqyrsam da, arasynda fanerıkterdiń qazaq qoǵamyna zııany jaıynda ózekti məseler kóterip qonaqtarymnyń "mıyn jedim". Sodan beri, mine 13 jyl óte shyǵypty. Men fanerıkterdiń ata jaýyna aınaldym. Olar da meni ata jaýynan ərmən jek kórdi.
Jek kóre bersin! Kúnderiń bitýge taıaý, fanerıkter! Óıtkeni sender ónerdi órisinen adastyrdyńdar. Senderdiń kesirlerińnen halyqtyń talǵamy azdy, teledıdarda sansyz saıqymazaq shoýlar qaptady. El senderdiń aýyz jybyrlatqandaryńa eltip otyrǵanda ury bılik 20 jylda qazaqty tonap ketti. Tonalǵanyn, aldanǵanyn endi bilip, oıbaılap jatyr, attandap jatyr. Biraq is bitip, qý ketken soń, san soqqannan ne paıda. Tezirek shyqsqa eken, zań!
Aktoty Rahmetollaqyzy, eger Siz Mədenıet Mınıstri retinde fonogrammany zańmen rettep berseńiz, esimińiz qazaq óneriniń tarıhyna altyn əriptermen jazylmaq!
Erlan Tóleýtaı
"Adyrna" ulttyq portaly
