Memleket basshysy sý tasqynynan zardap shekken turǵyndarǵa jan-jaqty qoldaý kórsetýdi tapsyrǵan bolatyn.
Batys Qazaqstan oblysy Bórli aýdanynda sý tasqynynan zardap shekken 66 otbasyǵa baspana satyp alynýda. Búgin aýdan boıynsha 50 otbasy páterlerine qonys aýdardy. Qalǵan 16 turǵynǵa jaqyn ýaqytta páterler satyp alynady.
Bórli aýdany boıynsha 60 turǵyn úıdiń qurylysy júrgizilýde. Josparǵa sáıkes, ár úıdiń aýdany 80 sharshy metr bolady.
Sý tasqynynan zardap shekken Láılá Jumaǵalıeva esimdi kóp balaly ana satyp alynǵan páterine kirip, memleket tarapynan jasalyp jatqan kómek úshin alǵysyn bildirdi.
«Sý tasqyny saldarynan Bórli aýdany Pýgachev aýylyndaǵy úıimiz jaramsyz bolyp qaldy. Komıssııanyń qorytyndysy boıynsha Aqsaı qalasynan úı satyp alýǵa kelistik. Tórt bólmeli páterge kirip otyrmyz. Endi qýanyshymyzda shek joq. Qoldaýy úshin birinshi kezekte Prezıdentimizge alǵys bildiremiz»- dedi Láılá Jumaǵalıeva.
Sondaı-aq, sý tasqynan zardap shekken aýdan turǵyndaryna 150 aılyq eseptik kórsetkish mólsherindegi áleýmettik tólemder júrgizildi. Búginde Bórli aýdany boıynsha turmystyq zattar men jıhazdardyń shyǵynyn óteý úshin 168 otbasyǵa 63 mln teńge kóleminde qarjy tólendi.
Batys Qazaqstan oblysy ákiminiń tapsyrmasy aıasynda qazirgi ýaqytta qurylys jumystary qarqyndy júrgizilýde. Oblys boıynsha sý tasqynynan zardap shekken aýdandarda 401 turǵyn úı salynýda.
Sonymen qatar, Batys Qazaqstan oblysynyń Terekti aýdanynda - 5 úı, Báıterek aýdanynda - 2 úısatyp alyndy. Al, Oral qalasyndaǵy jalǵyz baspanasy bolyp esepteletin, úıleri apatty dep tanylǵan saıajaı turǵyndaryna aldaǵy ýaqytta jańa úıler satyp alý jáne salý boıynsha jumystar júrgizilýde.
