Qazaqstan prezıdenti Qasym-Jomart Toqaev prezıdenttiń parlamenttegi ókildiginiń jańa basshysyn taǵaıyndaý týraly jarlyqqa qol qoıdy, dep habarlady Aqordanyń baspasóz qyzmeti.

"Memleket basshysynyń jarlyǵymen Beıbit Óksikbaıuly Isabaev Qazaqstan Respýblıkasy prezıdentiniń Qazaqstan Respýblıkasy parlamentindegi ókildiginiń basshysy qyzmetine taǵaıyndaldy", - dep jazylǵan jarlyqta.

Ol Qazaqstannyń Ázerbaıjandaǵy tótenshe jáne ókiletti elshisi qyzmetinen bosatyldy.

Buǵan deıin bul qyzmetti atqarǵan Qaırat Nurpeıisov basqa jumysqa aýysty.

Beıbit Isabaevtyń ómirbaıany

1962 jyly 4 jeltoqsanda Almaty oblysyndaǵy Baqanas aýylynda dúnıege kelgen.1985 jyly S.M.Kırov atyndaǵy Qazaq memlekettik ýnıversıtetin, 1999 jyly Qazaqstan SIM Dıplomatııalyq akademııasyn bitirgen. Saıası ǵylymdar doktory ǵylymı dárejesin alǵan.

1985-1994 jyldary BAQ-ta jumys istedi, "Órken – Gorızont" gazetiniń bas redaktory, Qazaq memlekettik televızııasynyń bas dırektory boldy.

1994-1997 jyldary Almaty ákiminiń orynbasary qyzmetin atqardy.

1997-1999 jyldary – SIM Dıplomatııalyq akademııasynyń tyńdaýshysy.

2002 jyly  Qazaqstan Respýblıkasy atynan "Ortalyq Azııa yntymaqtastyǵy" uıymynyń qyzmetin ulttyq úılestirýshi bolyp taǵaıyndaldy.

Ár jyldary Qazaqstannyń Pákistan, Túrkııa, Albanııa, Ázerbaıjan, Qyrǵyzstandaǵy tótenshe jáne ókiletti elshisi boldy.

2008 jylǵy aqpan-tamyz aılarynda – QR mádenıet jáne aqparat vıe-mınıstri.

2008-2009 jyldary – Qazaqstan prezıdentiniń baspasóz hatshysy.

"Parasat", "Qurmet","Za zaslýgı" (TMD) ordenderimen, QR Qurmet gramotasymen jáne kóptegen medalmen marapattalǵan.