Fransiianyŋ ekologiia ministrı Fransua De Riuji salyq töleuşılerdıŋ aqşasyn şaşty degen aiyptaulardan keiın otstavkaǧa kettı. Şeneunık qonaqtarǧa eŋ qymbat fransuz şaraby men teŋız şaianynan as äzırlep, köp aqşa jūmsaǧan. De Riujidıŋ özı azamattyq qoǧam ökılderımen kezdesuge qūqyǧym bar dep, aqtaluǧa tyrysqanymen, otstavkaǧa kettı. Janjal tuǧyzǧan oqiǧa eks-ministr Fransiianyŋ ūlttyq keŋes töraǧasy bolyp tūrǧan kezde oryn alǧan. Arnaiy zertteu jürgızgen Mediapart basylymynyŋ jazuynşa, banket Parijde bolǧan. Ony saiasatkerdıŋ äielı, Gala glamur-basylymynyŋ jurnalisı ūiymdastyrǧan-mys. Keşkı asqa tapsyrys berılgen şaraptyŋ bır bötelkesı 500 euro tūrǧan. Qonaqtarǧa sirek kezdesetın ärı öte qymbat omar teŋız şaianynan as äzırlegen. Būl qorşaǧan ortany qorǧauşylardyŋ aşu-yzasyn tuǧyzdy. Keiın belgılı bolǧandai, Fransua de Riuji qyzmet päterıne 63 myŋ euroǧa kürdelı jöndeu jūmystaryn jürgızgen. Ol aqşany biujet esebınen alǧan. Mūnan bölek saiasatker Fransiianyŋ batysyndaǧy Nant qalasynan memleketke tiesılı päterdı jeŋıldıkpen jaldaǧan. Fransua de Riuji atalǧan mälımetterdı jariialaǧan Mediapart basylymyn "ūrlanǧan suretterdı paidalanyp, daqpyrtqa negızdelgen jalǧan aqparat berdı" dep sotqa beretının mälımdedı. Mediapart redaksiiasy bolsa, "saiasatkerlerdıŋ tabysy men şyǧysyn qoǧam baqylap otyruy tiıs" dep mälımdedı.
Derekköz: "The Qazaq Times"
"Adyrna" ūlttyq portaly
