Respýblıkanyń jylý kózderin keshendi jańǵyrtý jónindegi Memleket basshysynyń tapsyrmasyn oryndaý maqsatynda QR Premer-Mınıstri Oljas Bektenov Kókshetaýdaǵy qazandyqtardy jóndeýge Úkimet rezervinen qarajat bólý týraly qaýlyǵa qol qoıdy.
Aqmola oblysynyń bıýdjetine aǵymdaǵy nysanaly transfertter túrinde №1 jáne №2 aýdandyq qazandyqtarda tıisti jumystar júrgizý úshin 816 mln teńgeden astam qarajat aýdarylady. Atap aıtqanda, konvektıvti bóliktiń paketterin jáne qazandyq agregattaryn jóndeý, sondaı-aq qyzdyrý betterin jáne shıki kómir býnkerlerin aýystyrý josparlanyp otyr.
Atalǵan sharalardy iske asyrý nátıjesinde qazandyqtardyń tıimdiligi artyp, apattar men toqtap qalý faktileriniń sany azaıady, bul aldaǵy jylytý maýsymynyń irkilissiz ótýin qamtamasyz etýge múmkindik beredi.
Sonymen qatar búginde Kókshetaýda qalanyń jylý jáne elektr energııasyna degen ósip kele jatqan qajettilikterin tolyq qamtamasyz etýge tıis tolyqqandy JEO salý jobasyn pysyqtaý jumystary jalǵasýda.
Onyń tehnıkalyq kórsetkishteri jylý qýaty – 520 Gkal/saǵ, elektr qýaty – 240 MVt bolady dep josparlanýda. Bul rette Kókshetaýdy odan ári gazdandyrýdy eskere otyryp, tabıǵı gazǵa kóshirý múmkindigi bar túrli otyndy kómirtozańdy qazandyqtar ornatý kózdelgen.
Joba bıylǵy 17 sáýirde Qazaqstan men Reseı arasynda qol qoıylǵan kelisim sheńberinde júzege asyrylady. Qazaqstan tarapynan ýákiletti uıym «Samuryq-Energo» AQ bıyl JEO jumysyn bastaý úshin tıisti jol kartasyn ázirledi.
