AQSh-ta kitapxanaǵa barǵanda 2-3 saǵat oqyǵannan keıin sharshap 15-20 mınýt uıyqtap alatyn edim. Kitapxanadaǵy oryndyqtar men dıvandar da óte jaıly edi. Aıaq qoıatyn arnaıy oryndyqtardy aıtsaıshy. Raxat edi. Bári adam úshin jasalǵan. Stýdentteri sol kitapxanada uıyqtap alsa da álemniń myqty ýnıverleri batys elderinde ornalasqan. Nobel syılyǵyn da kóp alatyn solar. Ǵylym da solarda.
Vashıngtonda mýzeıde sharshasań shalqańnan túsip jatyp demalatyn arnaıy bólme bar. Shyny kerek mýzeı aralaǵanda da sharshaısyń. Osyndaıda jatyp demalyp alatyn bólmeni de oılastyryp qoıǵan ǵoı jaryqtyqtar. Bári adam úshin.
Astanada kitapxanaǵa barsam 2-3 saǵat oqyǵannan keıin uıyqtaýǵa uıalamyn. "Ákeńniń úıinde jatyrsyń ba?" degen kózqaraspen qaraıtyny anyq. Qaqıyp otyryp oqýyń kerek. Sharshasań kózdi ilip alýǵa uıat. Bizdiń túsinikte kitapxana uıyqtaıtyn jer emes. Úıińe ketý kerek. Sodan ǵylymy damyp álemdi tańqaldyryp otyrǵanymyz da shamaly. Jaqynda mýzeıge barǵanda uzaq aralap, sharshaǵannan uzyn oryndyqty kórip shalqamnan túsip jattym. Ne ister eken dep ádeıi isteımin ǵoı. 1 mınýt ótpeı "Parkte jatyrsyz ba?" dep qyzmetker keldi.
Araǵa eki kún salyp meshitke kirip shyqtym. Jattym. Meshittiń kúmbezine qarap jaratýshyny oılap jatqanmyn. "Meshitte jatýǵa bolmaıdy" dep qyzmetker keldi. "Nege?" degen suraqty tike qoıdym. "Bizge solaı nusqaý bergen" deıdi. Ne otyrý kerek, ne turyp júrý kerek, ne namaz, ne kitap oqý kerek eken. Múmkin men jatyp, oılanyp jaratýshyǵa jaqyndap jatqan shyǵarmyn. Maǵan sol yńǵaıly shyǵar. Bastysy rezýltat emes pe?
Voobem, biz kóp nárseni qoldan qıyndatyp jiberetin sekildimiz. Syrtqy júris-turys, ramka men shekteýler kóp. Kóbisi maǵynasyz. Adamǵa rezýltatqa jetý úshin ne yńǵaıly bolsa sol jol durys qoı. Kitap oqyp sharshasa bir mezgil kitapxanada myzǵyp alsyn. Onda turǵan eshteńe joq. Mýzeı aralap sharshasa jatyp demalsyn. Bul qalypty proess. Meshitte jatyp jaratýshyny oılaý sol adamǵa tıimdi áser etse solaı istesin. Bastysy júris-turystyń syrtqy kórinisi emes rezýltatqa jetý!
Baýyrjan SERIKBAEV
"Adyrna" ulttyq portaly
